PM TAUR MATAN RUAK SIMU RELATÓRIU ELEISAUN JERAL 2018 NIAN HOSI CNE
Sorry, this entry is only available in Tagalog. For the sake of viewer convenience, the content is shown below in the alternative language. You may click the link to switch the active language.
Dili, 14 Agostu 2019: S.Exa. Primeiru-Ministru Taur Matan Ruak, tersa-feira ne’e, iha Palasiu Governu, simu iha audiénsia Prezidente Komisaun Nasionál ba Eleisaun (CNE-sigla Portugés), Alcino Baris, ho nia estrutura hodi hato’o relatóriu kona-ba eleisaun jerál antesipada iha tinan 2018 nian.
“Ami mai hato’o relatóriu eleisaun tolu ne’ebé konklui ona iha 2018 ba Sr. Primeiru-Ministru”, dehan Prezidente CNE ba imprensa sira hafoin remata enkontru ho Xefe Governu.
iha reuniaun ne’e, Prezidente CNE mós relata ba Xefe Governu kona-ba orsamentu ne’ebé alokadu ba Partidu Polítiku sira ne’ebé iha asentu parlamentar hetan auditoria ne’ebé rigór no maibe iha kooperasaun di’ak hosi Partidu Polítiku sira.
Aleinde ne’e, informa mós ba Xefe Governu atu presija halo alterasaun/revizaun ba lei eleisaun nian no kria dekretu lei ida kona-ba Sekretariadu permanente nia serbisu.
Ba preokupasaun ne’e, Xefe Governu hatán iha tempu badak Governu sei haree preokupasaun CNE nian ne’e hodi tau ba konsiderasaun.
Xefe Governu mós enkoraja CNE atu kontinua serbisu liuliu buka hametin kooperasaun ho organizasaun internasionál sira hodi bele eleva dezempeñu CNE nian nu’udar órgaun ne’ebé garante demokrasia iha Timor-Leste. HOTU