Sorry, this entry is only available in Tagalog and European Portuguese. For the sake of viewer convenience, the content is shown below in this site default language. You may click one of the links to switch the site language to another available language.

Dili, 13 Novembru 2019: S.Exa. Primeiru-Ministru Taur Matan Ruak, kuarta-feira ohin iha Palasiu Governu, fó pose ba José Luís Guterres nu’udar Prezidente Autoridade foun ba  Rejiaun Administrativa Espesiál Oekusi-Ambenu (RAEOA) no Zona Espesiál Ekonomia sosiál Merkadu (ZEESM), hodi troka Dr. Marí Alkatiri.

Iha liafuan badak hafoin fó tiha pose, Primeiru-Ministru Taur Matan Ruak hateten, sente orgullu fó pose ba José Luís Guterres nu’udar Prezidente Autoridade RAEOA, hodi hateten projetu iha Oekusi nu’udar projetu nasionál, nune’e Xefe Governu motiva Prezidente Autoridade foun ne’e atu kontinua obra ne’ebé iha ona, no buka hadi’ak karik buat balun la’o la di’ak.

“Projetu Oekusi, tebes  ne’e projetu nasionál projetu ida ke la’o maka’as loos hahú kria to’o ohin loron, buat barak ita halo tiha ona, mas buat barak mós ita seidauk halo i sira ne’ebé ita halo, naturalmente ekipa foun ba ne’ebá, Sr. Prezidente ita la ba halo foun, ita-boot sira ba hatutan buat ne’ebé sira halo ona, ida ne’ebé di’ak hatutan liután, ida ne’ebé ladi’ak ita muda no ida ne’ebé ladún di’ak ita ajusta iha tempu ho hanoin ida hanesan ohin Sr. Prezidente RAEOA dehan responde aspirasoins nesesidade povu Oekusi nian, ita-nia mehi mak ida ne’e halo nusa mak Oekusi-oan sira bele benefisia dezenvolvimentu ne’ebé ita halo iha ne’ebá”, dehan Xefe Governu.

Xefe Governu hatutan, Governu sentrál nakloke fó apoiu tomak ba Prezidente Autoridade foun RAEOA nian ho nia ekipa atu atividade hotu iha Oekusi labele para

Aproveita biban refere, Xefe Governu mós la haluha hato’o agradesimentu barak ba eis Prezidente Autoridade RAEOA, Dr. Mari Alkatiri ho nia ekipa ba serbisu ne’ebé hala’o tiha ona iha Oekusi, ne’ebé halo Oekusi naran morin.

“Ha’u hakarak iha ne’e pesoalmente agradese Sr. Prezidente Interinu i através ita-boot ba ekipa tomak em espesiál ba ita-nia maun-boot Marí Alkatiri ba ita-boot sira-nia esforsu ne’ebé halo paraké Oekusi la’o to’o ohin loron”,Tenik Xefe Governu.

Dr. José Luís Guterres hetan nomeasaun hosi Governu liuhosi Rezolusaun Governu nian no. 32/2019 loron 6 fulan Novembru 2019, tuir atribuisaun Lei no. 3/2014 loron 18 fulan Juñu, alterasaun dahuluk Lei no. 3/2019 loron 15 fulan Agostu 2019: Kona-ba Kriasaun Rejiaun Administrativa Espesiál Oekusi-Ambenu nu’udar pessoa koletiva territorial no direitu públiku, dotada ba autonomia administrativa, finanseira no patrimonial. Iha artigu 19º hateten; Governu iha kompeténsia hodi nomeia, através Rezolusaun, Prezidente Autoridade Rejiaun Administrativa Espesiál Oekusi-Ambenu, entre sidadaun timoroan ho idade pelumenus tinan 35, ba mandatu tinan lima.

José Luís Guterres, moris  iha Vikeke tinan 1954, nu’udar diplomata sénior timoroan ne’ebé ativu maka’as iha luta frente externa nian.

2002-2006, nu’udar Embaixador dahuluk Timor-Leste nian ba Estadu Unidu Amérika no ONU. Iha II Governu Konstitusionál ne’ebé lidera hosi Primeiru-Ministru Ramos Horta, hetan fiar sai Vise Ministru Negósiu Estranjeiru no Kooperasaun to’o Maiu 2007.

2007-2012, nu’udar Vise Primeiru-Ministru ba Asuntu Sosiál iha Governu Aliansa Maioria Parlamentar ne’ebé mak lidera hosi Primeiru-Ministru, Kay Rala Xanana Gusmão, no hetan filafali fiar nu’udar Ministru Negósiu Estranjeiru no Kooperasaun iha V Governu Konstitusionál hosi 2012 to’o 2015.

Hola parte iha toma pose ne’e, Membru Governu sira no familiares emposadu nian. HOTU