Primeiru- Ministru Konvoka Reuniaun Estraordinária ho Konsellu Interministerial Kona-ba Jestaun Apoiu ba Vitima Dezastre Naturais Foin Lalais Ne’e
Desculpe, este conteúdo só está disponível em Tagalogue. Por uma questão de conveniência para o utilizador, o conteúdo é mostrado abaixo no idioma alternativo. Pode clicar na ligação para alterar o idioma activo.
Dili, 9 Novembru 2019: S. Exa. Primeiru-Ministru Taur Matan Ruak, konvoka reuniaun estraordinária ho Konsellu Interministerial sira iha Sesta-feira lokraik ne’e iha Palasiu Governu, hodi diskute kona-ba asaun Governu nian atu apoiu ba vitima afetadu sira hosi inséndiu iha fulan Outubru ne’ebé afeta uma kain rihun resin ahi han iha Munisípiu haat hanesan; Likisá, Aileu, Ainaro no Bobonaro.
Iha reuniaun refere Primeiru-Ministru fó orientasaun ba Konsellu Interministerial atu aselera prosesu apoiu materiál konstrusaun nian ba vitima afetadu sira atu bele rekopera lalais sira nia hela fatin molok udan monu rai.
Orsamentu ne’ebé Governu prevé ba dezastre naturais ba tinan 2019 iha Ministériu Solidariedade Sosiál no Inkluzaun la to’o atu atende, tanba dezastre naturais tinan ne’e nia eskalaun boot tebes, nune’e Primeiru-Ministru konvoka reuniaun refere hodi orienta Ministra Finansas atu hasai fundu kontijénsia hodi bele sosa material konstrusaun sira atu Ministériu ne’ebé relevante hanesan Ministériu Administrasaun Estatal, Ministériu Solidariedade Sosiál no Sekretária Estadu Protesaun Sivíl kolabora hamutuk hodi bele prosesa lalais ajudu refere ba vitima afetadu sira.
Enkuantu hafoin enkontru remata Ministra Finansas, Sara Lobo ba media sira esplika: “Ha’u bele update ba ita-boot sira uitoan ba enkontru ohin ne’e, hanesan enkontru interministerial ba dezastre naturais ne’ebé mak Prezide hosi S.E. Sr. Primeiru-Ministru, objetivu hosi enkontru ohin atu bele aselera prosesu apoiu ba ita-nia komunidade sira ne’ebé afetadu ba dezastre naturais liuliu hosi Munisípiu haat ne’ebé afetadu tebes. Rezultadu ohin pozitivu tebes no iha tempu badak, Ministériu sira ne’ebé liga diretamente ba prosesu ne’e hanesan MAE, MSSI no SEPS atu hahú fó asisténsia ba vitima sira”.
Fó hanoin katak iha tinan ne’e liuliu iha fulan Outubru ne’e akontese inséndiu akompaña ho anin boot akontese iha Munisípiu haat hanesan; Likisá, Ermera, Aileu no Bobonaro, inklui Baukau hodi afeta uma populasaun nian besik rihun ida (1000) mak ahi han no inklui plantasaun kafé, no uma lulik sira, tuir relatóriu hosi Ministériu Administrasaun Estatal. HOTU