Desculpe, este conteúdo só está disponível em Tagalogue. Por uma questão de conveniência para o utilizador, o conteúdo é mostrado abaixo no idioma alternativo. Pode clicar na ligação para alterar o idioma activo.

Dili, 15 Novembru 2019:  S.Exa. Primeiru-Ministru Taur Matan Ruak, fó bem-vindu ba Diretór Gabinete Asuntu Marítima ba Sudeste Aziátiku Estadu Unidus Amérika nian, Mark D.Clark, iha audiénsia  ne’ebé hala’o Sesta-feira ne’e iha Palasiu Governu-Dili.

Iha enkontru ne’ebé akompañadu hosi Embaixadora Estadu Unidos nian iha Dili, Kathleen M. Fitzpatrick, Xefe Governu ho Diretór Gabinete Asuntu Marítima ba Sudeste Aziátiku ko’alia kona-ba relasaun no kooperasaun pais rua nian.

Primeiru-Ministru Taur Matan Ruak, aproveita agradese  apoiu EUA nian ba Timor-Leste durante ne’e iha área oioin, no husu atu kontinua apoia iha setor save sira ne’ebé sai prioridade ba Governu  ne’e nian atu atinje  iha governasaun.
Xefe Governu esplika, Governu daudaun ne’e  konsolida área sira hanesan defeza, seguransa, governasaun di’ak, justisa, kombate mal nutrisaun no projetu tasi-mane no hein katak asisténsia hosi EUA nian ba prioridade sira ne’e.
Liután  Prezidente Repúblika ba dala tolu ne’e  hatutan, relasaun Timor-Leste ho EUA la’ós opsaun  maibé ne’e  eskolla ida.

Entretantu Diretór Gabinete Asuntu Marítima ba Sudeste Aziátiku, Mark D.Clark, subliña EUA  iha responsabilidade  ba Timor-Leste nu’udar  pais  ne’ebé demokrasia forte, transparente no ezemplu di’ak kona-ba rekonsiliasaun ne’ebé bele kontribui ba rejiaun no mundu.

Nia hatutan, EUA iha komitmentu atu ajuda   hasa’e ekonomia Timor-Leste nian, liuhosi fó tulun iha agrikultura, promosaun turizmu no promove ajuda diversifika ekonomia Timor-Leste nian, aleinde fó asisténsia liuhosi MCC ba programa bee moos no sanitasaun.

Nia salienta, relasaun EUA ho Timor-Leste la’ós de’it iha nivel estadu ba estadu maibé mós hosi povu ba povu, no kus liu Diretor ne’e, apresia ho Timor-Leste ne’ebé bele rezolve nia disputa fronteira marítima ho nia nasaun viziñu tuir lei internasionál, ne’ebé bele sai ezemplu ba nasaun seluk iha mundu ho disputa ne’ebé hanesan.

Diretór Gabinete Asuntu Marítima ba Sudeste Aziátiku Estadu Unidus Amérika nian, Mark D.Clark, vizita Timor-Leste entre loron 13 to’o 16 fulan Novembru 2019  hodi haforsa relasaun  Timor-Leste ho EUA  aleinde hodi fahe no ko’alia a kona-ba vizaun  Indo-Pasífiku ne’ebé livre no nakloke.

Durante iha Dili, nia hala’o enkontru ho lideransa Governu Timor-Leste no sosiedade sivíl hodi halo diskusaun kona-ba relasaun entre Timor-Leste no Estadus Unidus Amérika, inklui programa ne’ebé lidera hosi Embaixada EUA iha Dili. Nia mós halo diskusaun kona-ba programa anti korrupsaun, rona lider joven sira kona-ba sira-nia metas no sorumutu ho lider feto negósiu ne’ebé sira ne’e hetan suporta hosi parseria Embaixada EUA nian ho povu Timor-Leste.

Mark D.Clark responsabiliza ba relasaun Bilateral ho Timor-Leste no Indonézia, Filipina, Malázia, Singapura no Brunei. Nia mós serbí ba Indonézia Malázia, Haiti, Nigéria no Kénia inklui involve mós prosesu dame iha Sudaun Súl. HOTU