Desculpe, este conteúdo só está disponível em Tagalogue. Por uma questão de conveniência para o utilizador, o conteúdo é mostrado abaixo no idioma alternativo. Pode clicar na ligação para alterar o idioma activo.

Dili, 14 Novembru 2019:  S.Exa. Primeiru-Ministru Taur Matan Ruak, kinta-feira ne’e hala’o vizita ba Munisípiu Aileu hodi hasoru malu ho komunidade hosi Suku Bando Dato no Lauisi ne’ebé mak afetadu ba planu projetu instalasaun Sidade Universitáriu.

Iha Diálogu ne’ebé hala’o iha Salaun Administrasaun Munisípiu iha Aileu Vila ne’e, Xefe Governu hateten, planu instala Sidade Universitáriu iha Aileu ne’e, nu’udar orgullu ba Aileu-oan sira i ne’e hanesan oferta no karik aileu-oan sira la simu, Aileu mak sei lakon.

Xefe Governu realsa, klaru ke dezenvolvimentu iha mós konsekuénsia hanesan mós uluk luta ba ukun rasik an,  tanba dezenvolvimentu  sempre afeta ba ema balun nia propriedade, maibé investimentu ne’e sei lori benefísiu boot ba Aileu iha futuru oin mai.

“Ne’e oferta ba imi, se imi la simu, imi mak lakon. Ha’u-nia hanoin ita tenke halo, klaru ké ne’e afeta, mas nia di’ak sei mai ikus, ne’e investimentu boot ké sei fó benefísiu boot iha futuru oin mai ba imi-nia oan no bei-oan sira”, dehan Xefe Governu wainhira hasoru malu ho família afetadu sira.

Xefe Governu fó garante ba família afetadu sira katak, Governu sei la foti sidadaun nia rai pedasuk ida sem fó indiminizasaun.

“Hanesan Primeiru-Ministru garante ba imi, imi-nia fatin sei fó indiminizasaun, sei la foti gratuita, imi-nia rai pedasuk ida estadu sei la foti de’it, sei fó indiminizasaun tuir regra ne’ebé mak iha”, garante Xefe Governu ba família afetadu sira.

Ikus liu Xefe Governu husu ba Autoridade Munisípiu no Ministériu relevante  atu tuur hamutuk  ho família afetadu sira buka solusaun, hodi bele hetan win-win soultion.

Entretantu reprezentante família afetadu konfesa katak, sira la’ós lakohi Sidade Universitáriu instala iha sira nia terenu, maibé preokupa ho sira-nia réalokasaun ba iha fatin seluk, aleinde sira fó sujestaun ba Governu buka fali terenu seluk ne’ebé abandonadu, tanba konsidera terenu atual iha poténsia ba ekonomia.

Hatán ba ida ne’e, Xefe Governu hateten, Governu halo serbisu lubuk ona, tanba ne’e labele fila ba kotuk, maibé buka oinsá hetan desizaun definitivu ida hodi bele indeminiza komunidade afetadu no oinsá halo réalokasaun ba terenu foun ne’ebé Governu sei prepara.

Sorumutu ne’e realiza, tanba iha Sesta-semana kotuk, família afetadu na’in hitu hanesan ne’e ba korta Xefe Governu iha serbisu fatin Palasiu Governu, hodi hato’o sira-nia lamentasaun kona-ba prosesu negosiasaun iha terenu, nune’e Xefe Governu hakarak ba hasoru direita ho família afetadu sira ne’e hodi fó motivasaun atu kolabora ho di’ak planu ne’e tanba nia benefísiu ne’e sei ba Aileu oan tomak iha futuru oin mai.

Hola parte iha sorumutu ho komunidade afetadu sira ne’e maka hanesan; Ministru Ensinu Superior no Siénsia, Longuinhos dos Santos, Ministru Obras Públika, Salvador Soares dos Reis Pires, Ministru Defeza no Ministru Interinu Interior, Filomeno da Paixão de Jesus no Sekretáriu Estadu ba Rai no Propriedade, Mário Ximenes, Administrador Munisípiu Aileu, Komandante PNTL Munisípiu Aileu, Diretór liña ministerial sira   no komunidade afetadu hosi Suku Bando Dato no Lauisi. HOTU