Desculpe, este conteúdo só está disponível em Tagalogue. Por uma questão de conveniência para o utilizador, o conteúdo é mostrado abaixo no idioma alternativo. Pode clicar na ligação para alterar o idioma activo.

Dili, 3 Dezembru 2018: Governu Konstitusional da-ualu iha tinan oin 2019, sei define polítika foun kona-ba uzu transporte liuliu ba karreta Estadu, ho objetivu atu hamenus kustu ne’ebé daudaun ne’e gastu maka’as ba iha transporte Estadu nian, no Atu fasilita di’ak polítika refere, Governu sei hahú uluk hala’o  levantamentu ba propriedade/asset hotu Estadu nian tantu móveis no imóveis iha Ministériu sira, no Instituisaun sira Estadu nian hodi bele hatene loloos asset sira ne’e nia kondisaun no nia paradeiru.

Hosi polítika foun ne’e, mak sei define serbidor estadu/funsionáriu sira sé mak bele lori karreta estadu, oinsá lori karreta estadu no karreta tipu saida mak bele uza iha sidade laran (Dili) no ba area rural.

Tuir S. Exa. Primeiru-Ministru Taur Matan Ruak katak, Governu presiza duni define polítika foun kona-ba uzu transporte Estadu nian nune’e hodi evita gastu maka’as no mós oinsá poupa osan Estadu nian hodi halo fali ba buat seluk ne’ebé nesesáriu, se polítika atuál ne’e mak sei kontinua, sei lori problema boot ba Estadu liuliu iha gastu, tanba tuir informasaun preliminaria ne’ebé Xefe Governu iha, gastu ba transporte Estadu daudaun ne’e kada tinan porvolta $20 millaun.

Nune’e Xefe Governu husu apoiu ema hotu nian ba polítika foun ida ne’e. HOTU