Dili, loron 19 fulan-janeiru tinan 2021 – Sua Eselénsia Primeiru-Ministru Taur Matan Ruak, tersa  ne’e iha Palásiu Governu-Dili, simu iha audiénsia Enkarregadu Negósiu hosi Embaixada Estadus Unidus nian iha Dili, Elias Parra hodi troka ideia kona-ba kooperasaun país rua nian.

Iha hasoru malu ne’e, Enkarregadu Negósiu Embaixada EUA partilla informasaun sira kona-ba misaun Norte Amerikanu nian iha Timor-Leste, projetu Kompaktu hosi Millennum Challenge Corporation (MCC) ne’ebé Timor-Leste hanesan benefisiáriu ida ba fundu ne’e, aleinde informa mós kona-ba nomeasaun Embaixadór foun EUA nian ba Timor-Leste, ne’ebé sei to’o iha Timor-Leste iha fulan febereiru mai ne’e.

Nia hatutan, tanba situasaun Pandemia KOVID-19, halo inisiativa ne’e la’o neineik uitoan maibé garantia katak sei la’o nafatin no hein katak bele asina akordu implementasaun iha fulan Juñu tinan ne’e.

Daudaun ne’e halo hela estudu preparatóriu no levantamentu ba dadus ne’ebé presiza atu determina projetu sira ne’ebé sei inklui iha akordu implementasaun nian, ne’ebé tuir planu sei asina iha Juñu tinan 2021. Programa ne’e sei ho valór ida besik millaun dolar amerikanu 285 no sei implementa iha períodu tinan lima nia larab, ho atensaun liu ba área edukasaun, bee moos no saneamentu.

Iha fulan-jullu tinan 2018, Governu Timor-Leste asina ona, ho akordu finansiamentu inisiál ida ba apoiu finanseiru ida hamutuk dolar amerikanu rihun 750 hodi harii ekipa ida, ne’ebé integra iha programa Millennium Challenge Compact, ne’ebé responsavel ba identifikasaun setór ekonómiku sira ne’ebé atu dezenvolve durante implementasaun programa ne’e nian. Ekipa Dezenvolvimentu ba Kompaktu Governu Timor-Leste nian (CDT-TL), ne’e lidera hosi Embaixadór Constâncio Pinto, ne’ebé ofisíalmente harii ona iha fulan-marsu tinan 2019.HOTU