Dili, 15 Febereiru 2019: S. Exa. Primeiru-Ministru, Taur Matan Ruak, subliña, enkuantu Tribunal Rekursu (TR) seidauk hasai desizaun ruma kona-ba keixa hosi opozisaun Bankada Partidu Fretilin nian kona-ba alterasaun dahuluk Lei Atividade Petrolífera nian (LAP), mak Governu sei kontinua hala’o prosesu normal atu selu asaun partisipasaun ConocoPhillips no Shell nian iha kampu Greater Sunrise, hodi hein rezultadu hosi Tribunal Rekursu, tanba Lei LAP hafoin promulgadu hosi Xefe Estadu iha loron 17 fulan Janeiru 2019,  tama ona iha vigor

“Ita hein oinsá maka desizaun Tribunal nian, de qualquer de formas prosesu normal ne’e la’o hela, la’o di’ak loos. Hamenus que Tribunal hateten katak para! mas enkuantu ida ne’e seidauk iha desizaun ida sai, atividade Governu nian kontinua lao nafatin, prosesu sira lao nafatin normalmente”, informa Xefe Governu ba jornalista sira, kinta-feira ne’e hodi hatán ba preokupasaun opozisaun Bankada Fretilin nian ne’ebé husu Governu atu labele halo prosesu pagamentu relasiona ho sira nia pedidu fiskalizasaun abstrata kona-ba legalidade no konsekuénsia hosi alterasaun LAP.

Alterasaun dahuluk LAP hetan promulgasaun iha loron 17 fulan Janeiru 2019 no públika iha loron tuir mai iha Jornal da Repúblika ho kódigu: Lei N.º 1/ 2019 loron 18 Janeiru, Primeira Alterasaun ba Lei N.º 13/2005, loron 2 Setembru, Lei Ba Atividade Petrolífera.

Wainhira Governu hala’o prosesu hotu ona hodi selu partisipasaun Kompañia rua nian ho montante $650 millaun, mak automatikamente Timor-Leste mak sei domina asaun 51% iha kampu Greater Sunrise, hodi fó kbiit ba Kompañia petróleu Timor-Leste nian, Timor-GAP atu foti desizaun ruma relasiona ho produsaun petróleu iha kampu Greater Sunrise. HOTU