Dili, loron 19 fulan-marsu tinan 2021 –Daudaun ne’e mosu polémika liuliu iha Europa kona-ba vasina AstraZeneca nian, hafoin País balun Europeu nian deside suspende tiha vasina AstraZeneca, ne’ebé kauza hosi kazu balun raan entupidu, depois vasinasaun.

Ba polémika ida ne’e, Primeiru-Ministru Taur Matan Ruak afirma, enkuantu Organizasaun Saúde Mundial [OMS] ne’ebé hanesan konselleiru ba Governu Timor-Leste nian seidauk pronúnsia katak AstraZeneca ne’e la di’ak, Governu sei mantein avansa ho vasina ida ne’e.

“Ita iha konselleiru boot ida rekoñesidu internasionalmente mak Organizasaun Mundial Saúde [OMS], enkuantu OMS seidauk dehan vasina ne’e la di’ak, ita sei nafatin avansa ho AstraZeneca”, afirma Xefe Governu foin lalais ne’e hodi hatán ba preokupasaun iha rai-laran kona-ba AstraZeneca.

Konsellu Ministru iha loron 15 fulan-febereiru tinan 2021, aprova ona Rezolusaun  Governu nian kona-ba planu nasionál vasinasaun kontra KOVID-19, atu uza vasina AstraZeneca tuir rekomendasaun OMS nian, tanba vasina refere, apropriadu liu ba kontestu Timor-Leste nian, ne’ebé OMS konsidera seguru no efikás, no ne’ebé nia kondisaun nesesária sira armazenamentu no refrijerasaun nian, entre grau rua no grau ualu sentígradu.

Timor-Leste adere ona ba mekanizmu “COVAX Facility” no sei iha asesu gratuitu ba vasina AstraZeneca 20% husi ninia populasaun. Enkuantu akizisaun no implantasaun vasina sira-nian ba populasaun 80% sira seluk sei iha hela prosesu diskusaun governamentál nian, hamutuk ho parseiru sira dezenvolvimentu prinsipál nian, tuir mobilizasaun rekursu, akizisaun no prestasaun servisu sira. Parsela vasina dahuluk nian ne’e prevee katak sei disponibiliza ba país iha inísiu trimestre daruak tinan 2021 nian.

Notas:
País lubuk ida hosi Europeu nian, deside suspende uza vasina Oxford-AstraZeneca, nu’udar meius prevensaun hafoin mosu kazu raan entupidu hosi indivídu sira ne’ebé hetan vasinasaun, maibé tuir dadus hosi AstraZeneca rasik, iha rejistu kazu 37 ne’ebé raan entupidu hosi total ema millaun 17 ne’ebé hetan ona vasina iha País Europeu sira.

Akontesimentu ne’e, daudaun iha hela monitoramentu ho kuidadoza hosi Órgaun Reguladora sira, hodi buka hatene nia motivu.

Maibé tuir Organizasaun Mundial saúde (OMS), Ajénsia Reguladora Medikamentu Europa nian  [EMA] no “British Drug Administration”, subliña, la iha relasaun entre raan entupidu no vasinasaun, tanba  hosi kazu 37 ne’e, la iha esplikasaun bilolójika  kona-ba oinsá vasina ne’e implika ba raan entupidu, tanba ne’e órgaun hirak ne’e konsidera la iha razaun atu hapara uja vasina AstraZeneca. HOTU