Iha ona diskusaun atu tau Forsa Armada iha fronteira Timor-Leste Indonézia -Primeiru-Ministru Taur Matan Ruak

• Pasajen ilegál krime organizadu

Dili, loron 24 fulan agostu tinan  2021 –  Sua Eselénsia Primeiru-Ministru Taur Matan Ruak, afirma,  konsulta  ona ho Prezidente Repúblika  no fó ona instrusaun ba Vise Ministru Interior no Ministru Defeza  halo diskusaun  atu tau Foras Armada (F-FDTL) iha fronteira  Timor-Leste ho Indonézia,  tanba Xefe Governu mós preokupadu ho timoroan pasajen  ilegal ba Indonézia  ho númeru boot foin dadauk ne’e ne’ebé  autoridade Seguransa Timor-Leste nian la iha koñesimentu  enkuantu  Autoridade Seguransa Indonézia mak deskobre fali  no kaptura hodi deporta fila.

“Ha’u konsulta ho Sua Eselénsia Prezidente Repúblika no fó ona instrusoins ba Vise Ministru Interiór no Ministru Defeza para halo diskusaun para ké tau Forsa Armadas iha Fronteiras sei la’ós tinan ida ne’e, tinan oin, ha’u hakarak ha’u nia mandatu remata Forsas Armadas iha fronteiras, Ha’u mós preokupa uma posível pasajen ida ema atus nune’e, Indonézia hatene ita la hatene ne’e imposivel”, dehan Xefe Ezekutivu hodi hatán ba preokupasaun deputadu sira-nian, tersa ne’e iha Parlamentu Nasionál iha ámbitu  debate estensaun Estadu Emerjénsia ba dala -17.

Nune’e Xefe Governu konkorda ho opiniaun sira membru Parlamentu Nasionál sira-nian atu tau Forsa Armada iha fronteira hodi bele kontrola di’ak fronteira.

 “Ha’u rasik negósia ho komandante Udayana Bali momentu ne’ebá, William da Costa posibilidade atu dezmilitariza fronteira, Indonézia dehan lae, dehan Timor-Leste hakarak dezmilitariza bele tanba Indonézia nian mandatu konstituisaun forsa Armadas sira tau seguransa tanba ne’e ami labele, entaun ita nian mak mantein Polísia, ita-nia polísia sira halo esforsu liu-liu UPF halo esforsu boot, ita labele ezije liu buat ne’ebé sira bele halo, ita agradese tomak sira-nia sakrifísiu maibé iha mós elementu balun uza buat ida ne’e sai negósiu”,.

Liután Xefe Governu konsidera  pasajen ilegal ba Indonézia ne’e iha indísius ba krime organizadu  tanba hetan fasilita hosi elementu PNTL balun,  nune’e halo númeru barak liu ultra passa ba Indonézia sem deteta hosi Unidade Polísia Fronteira-UPF,  tanba ne’e nia parte orienta ona hodi  identifika elementu ne’ebé deskonfia involve hodi kaer nune’e bele responsabiliza ba nia hahalok.

Eis Xefe Estadu ne’e hatutan, tanba iha kooperasaun di’ak ho Embaixador Timor-Leste iha Indonézia no Autoridade Provínsia NNT-Indonésia nian, nune’e iha operasaun hosi Polísia Indonézia (POLRI) hodi halo buska tama-sai  uma kaer sidadaun ilegais timoroan sira ne’ebé daudaun ne’e hela  iha Atambua.

“Ha’u bele iha ne’e hateten, katak pasajen ilegais iha fronteira ne’e kuaze ha’u bele hateten  98 ou 99 % krime organizadu, iha ita-nia elementu polísia balun, ha’u haruka kaer, iha Veteranus balun ha’u haruka kaer, ne’e la’ós foin  ne’e buat ne’e mai tempu naruk ona í daudaun ekipa ida serbisu ho polísia Indonézia para tama uma sai uma kaer ema, ita iha kooperasaun di’ak ho señór Embaixadór Indonézia akreditadu iha Timor, Autoridade sira provínsia NTT nian, ita iha kooperasaun di’ak ne’e ajuda ita, ita lori ita-nia oan sira mai iha ne’e”, tenik eis Xefe Estadu Maior Jenerál F-FDTL. HOTU

#MediaGPM.