Dili, loron 23 fulan-novembru tinan 2020 –Sua Eselénsia Prezidente Repúblika, Dr. Francisco Guterres Lú Olo, segunda lokraik iha Palasiu Prezidente Nicolau Lobato, Dili, fó pose ba ekonomista timoroan, Dr. Rui Augusto Gomes nu’udar Ministru Finansas foun hodi troka nia antesesór, Dr. Fernando Hanjam, ne’ebé hatama ona nia karta rezignasaun ba Xefe Governu iha loron 5 fulan novembru tinan 2020 ho motivu problema saúde.

Iha intervensaun hafoin serimónia pose, Sua Eselénsia Primeiru-Ministru, Taur Matan Ruak, tau konfiansa boot ba esperiénsia Dr. Rui Gomes nu’udar personalidade  ida ne’ebé iha méritu as tebes, idoneidade no esperiénsia kle’an, empeñu di’ak iha funsaun públika difisil sira ho natureza ezekutiva hodi konsidera nu’udar pesoa serta atu lidera destinu Ministériu Finansas to’o lejizlatura ne’e nia rohan.

“Ha’u aproveita biban ida ne’e, espresa ha’u-nia satisfasaun no haksolok ne’ebé  kle’an, tanba bele   konta ho Dr. Rui Gomes iha ha’u-nia Governu, no ha’u deseju votu saúde di’ak no susesu ba mandatu ne’ebé hahú agora”, dehan Xefe Ezekutivu iha intervensaun.

Xefe Governu mós, la haluha agradese ba nia eis Ministru Finansas, Fernando Hanjam, ba nia responsabilidade no lealdade ne’ebé hatudu ona ba Primeiru-Ministru no Estadu nu’udar Ministru Finansas hodi serbisu ba Governu Konstitusionál da-VIII.

“Tanba serbisu ne’ebé halo ona ba VIII Governu Konstitusionál, no tanba  sentidu responsabilidade no lealdade ne’ebé  hatudu ona ba Primeiru-Ministru no ba Estadu, publikamente, ha’u hato’o ha’u-nia gratidaun ba Dr. Fernando Hanjam no ha’u  formula votu ba nia saúdeatu rekupera fila lalais”, Agradese Xefe Governu.

Aleinde ne’e Xefe Governu mós  hato’o  gratidaun ba Xefe Estadu ba komprensaun no  kolaborasaun ho Governu relasiona ho subtituisaun ba eis Ministru Finansas Fernando Hanjam.

Iha okaziaun ne’e, Primeiru-Ministru mós agradese ba Lider Partidu apoiu Governu nian, Dr. Mari Alkatiri hosi FRETILIN no Señór José Naimori hosi KHUNTO ne’ebé apoia tebes Governu hodi identifika personalidade kompetente atu kaer pasta Finansas.

Atu taka diskursu, la haluha Xefe Governu mós hato’o apresiasaun no agradese ba Vise Ministra Finansas Sara Lobo Brites ne’ebé ne’ebé bele asumi pasta interinamente durante auzénsia Ministru no hein katak bele serbisu hamutuk di’ak ho Ministru Rui Gomes hodi kontribui ba desezivamente.  

Eis Ministru Finansas Fernando Hanjam simu pose hosi Prezidente Repúblika iha loron 24 fulan-juñu tinan 2020, maibé infelizmente labele kontinua empeña nia funsaun nu’udar Ministru Finansas tanba kestaun saúde, nune’e iha loron 5 fulan novembru tinan 2020, entrega nia karta rezignasaun ba Xefe Governu.

Entretantu Ministru Finansas foun, Rui Gomes antes asumi pasta Ministru Finansas, nu’udar asesór Ekonomia ba atual Prezidente Repúblika, Dr. Francisco Guterres Lú Olo, nia mós hetan konfiansa hosi Primeiru-Ministru Taur Matan Ruak hodi lidera Komisaun Elaborasaun ba Planu Rekuperasaun Ekonómika pós Kovid-19, aleinde ne’e hanesan eis Ministru Finansas iha VII Governu Konstitusionál no Eis Xefe Kaza Sivíl Prezidénsia Repúblika iha mandatu Prezidénsia Taur Matan Ruak atual Primeiru-Ministru. HOTU/M-GPM