Intervensaun S.E. Primeiru-Ministru Taur Matan Ruak nian iha Parlamentu Nasionál kona-ba Konfirmasaun ba Deklarasaun Estadu Emerjénsia ba dahaat

Parlamentu Nasionál, loron 11 fulan-agostu tinan 2020

Povu Timor Lorosa’e, ne’e ba-dala haat maka Governu filafali mai Parlamentu Nasionál atu defende nesesidade Deklarasaun Estadu Emerjénsia, ultimo deklarasaun Estadu Emerjénsia iha dia 26 de junho 2020, iha dia 30 de junho, Governu desmantela Sala Situasaun, depois de ida ne’e ita iha intervalu fulan ida. Governu sente katak iha nesesidade fila fali mai, tanba ne’e ohin ami mai hateten, tanba saida mak presija Estadu Emerjénsia. Depois de diskusaun kle’an ho Sua Eselénsia Sr. Prezidente da Repúblika i para hateten loloos, akonsellamentu Sua Eselénsia Sr. Prezidente katak iha nesesidade ita hili deklarasaun Estadu Emerjénsia.

Iha razaun tolu, primeiru, Kovid iha ita-nia nasaun viziñu númeru aumenta ba bebeik, Indonézia ultrapasa 127 mil, Austrália ultrapasa 21 mil, ne’e ita la ko’alia kona-ba nivel global ne’ebé nia númeru sa’e ba besik ona 20 milloins ho 700 ital mil mate/óbitu, segundu risku ba kontajiu ou risku ba importasaun ne’e boot liu, pior liu kuandu ita iha inseguransa jurídika. Sr. Prezidente, Distintu deputadu sira hatene Embaixada sira, sira invoka Konvensaun Viana i sira la kumpri regra sira ne’ebé ita impoin, se Embaixada sira hanesan ne’e, ita-boot sira haree tok oinsá mak ita kontrola situasaun iha ita-nia rai laran, entaun haree inseguransa ida ne’e, dalan mesak mak ita avansa ba iha Estadu Emerjénsia, i entaun Governu deside iha dia 3 de Agostu halo pedidu ba iha Prezidente da Repúblika i dia 4 primeiru kazu importadu mosu iha ita-nian i justifika liután katak nia iha nesesidade ita atu hahú filafali Estadu Emerjénsia ih ita-nia rain.

Tanba ne’e mak ohin ami mai justifika nesesidade atu implementa Estadu Emerjénsia iha ita-nia rain ne’e. Tanba ne’e ha’u lori Governu nia naran agradese ba Parlamentu Nasionál ba ita-boot sira-nia komprensaun, hein katak bele konfirma Estadu Emerjénsia bele la’o dadauk ona, i Governu halo esforsu tomak paraké implementa tuir mandatu ne’ebé iha. Obrigadu!