Dili, 9 Novembru 2019:   S.Exa. Primeiru-Ministru Taur Matan Ruak sei fó pose ba Dr. José Luís Guterres nu’udar Prezidente Autoridade Rejiaun Administrativa Espesiál Oekusi-Ambenu no Zona Espesiál Ekonomia Sosial Merkadu (RAEOA-ZEESM) iha kuarta-feira semana oin, loron 13 fulan Novembru, iha Palasiu Governu-Dili, ba mandatu tinan lima oin mai.

Eis Vise Primeiru-Ministru no Eis Ministru Negósiu Estranjeiru ne’e, hetan nomeasaun iha reuniaun Konsellu Ministru loron 9 fulan Novembru tinan 2019 liuhosi proposta Rezolusaun Governu-nian ne’ebé mak aprezenta hosi Primeiru-Ministru, Taur Matan Ruak.

Tuir artigu 19.^o Lei no.3/2019 loron 15 fulan Agostu, Alterasaun Dahuluk ba Lei no.3/2014, loron 18 fulan Juñu, Kona-ba Kriasaun Rejiaun Administrativa Espesiál Oekusi-Ambenu no Estabelese Zona Espesiál ba Ekonomia Sosiál Merkadu Oekusi-Ambenu no Ataúru: haktuir, Prezidente Autoridade tenke sidadaun timoroan ho idade pelumenus tinan 35 no nomeia hosi Governu liuhosi Rezolusaun ba mandatu tinan lima, no renova dala ida de’it. HOTU