Dili, 27 Abril 2020: S.Exa. Primeiru-Ministru Taur Matan Ruak iha Sesta-feira lokraik semana kotuk, hetan xamada telefonika hosi nia ómologu australianu, Scott Morrison, ne’ebé reteira Austrália nia apoiu no solidariedade ba Timor-Leste iha luta kontra pandemia surtu koronavírus ka COVID-19.

Iha Konversa telefonika durante minutu 12 ne’e, Xefe Governu país viziñu rua ne’e mós aprofunda liután relasaun no kooperasaun país rua nian ba oin. Iha ne’ebé Austrália prontu ajuda Timor-Leste ho ekipamentu medikamentu balun tan no  tékniku iha laboratóriu.

Entretantu Primeiru-Ministru timoroan agradese tebes ba apoiu no solidariedade hosi Governu no povu australianu embora iha Austrália mós hasoru problema COVID-19.

Entretantu aproveita konversa telefonika ne’e Xefe Governu timoroan husu deskulpa ba nia ómologu australianu tanba labele vizita Austrália iha fulan Abril hanesan promete ona, relasiona ho propagasaun pandemia surtu-COVID-19   ne’ebé afeta mundu tomak inklui mos Timor-Leste, no promete sei agenda ba okaziaun seluk.HOTU