Dili, loron 11 fulan-marsu tinan 2022

Komunikadu ba Imprensa :  

Votus Felisitasaun S.E. Primeiru-Ministru Taur Matan Ruak nian ba Prezidente Eleitu Sul Koreanu,  Yoon Suk-yeol

Lori Governu no povu Timor-Leste nia naran hato’o ha’u-nia ksolok boot ba Sr. Yoon Suk-yeol ne’ebé eleitu hanesan Prezidente Repúblika Koreia nian, hodi dezeja ba nia susesu boot iha dezempeña ninia knaar sira ne’ebé importante.

Timor-Leste no Koreia Súl selebra tinan ne’e, aniversáriu da-20 ba estabelesimentu relasaun diplomátika entre país rua ne’e. Durante dékada rua ikus ne’e, hosikedas Restaurasaun Independénsia ita bele konsolida nafatin no loloos relasaun amigável ida-ne’e bazeia ba valór universál dame, liberdade, igualdade no solidariedade nian, nomos demokrasia, respeitu ba direitus umanus, multilateralizmu no ba kooperasaun internasionál.

Ha’u fiar mós katak, jerasaun atuál Timoroan no Koreanu sira sei hatene oinsá atu kontinua relasaun fraternu ida-ne’e, la’ós de’it iha lasu institusionál sira ne’ebé promove ona iha saúde, iha edukasaun, iha formasaun profisionál, iha promosaun empregu nian, iha edukasaun sívika no desportiva  no iha servisu sira bee moos nian, maibé, liuliu, iha interkámbiu dezenvolvidu sira ne’ebé estabelese ona entre ita-nia sidadaun sira no organizasaun sira sosiedade sivíl nian, iha ne’ebé programa ne’ebé tinan-tinan simu traballadór Timoroan sira atus ba atus  iha Koreia Súl.

Iha data importante ida-ne’e, ba ita-nia país rua ne’e, ha’u husu ba ita-boot, Señór Prezidente, atu simu ha’u-nia ksolok boot no ha’u-nia sinseru votus progresu no prosperidade nian ba povu amigu Repúblika Koreia nian.