Kona-ba Estensaun Estadu Emerjénsia, Governu Preokupa ba Ema nia Vida Nune’e mós Ema Nia Kabun Hotu
Dili, 23 Abril 2020: S.Exa. Primeiru-Ministru Taur Matan Ruak afirma, Governu daudaun ne’e preokupa no halo esforsu maka’as atu tau matan ba ema nia moris, oinsá surtu Korona virus ka COVID-19 labele agrava populasaun hanesan iha nasaun sira seluk, aumesmu tempu Governu mós la haluha halo esforsu hela buka medida sira oinsá atu rekupera ekonomia povu nian ne’ebé afetadu hosi situasaun ne’e rasik.
“Ita haree buat rua dala ida hotu, ida ita-nia moris. Ita-boot sira hatene ke moras ida ne’e ataka ona ema kuaze 2.6 milloins iha mundu, kuaze 180 ital mil mak mate ona(dadus atualizadu). Ita seidauk mate, mas númeru sa’e, entaun atensaun ita-nian ne’e ita fó prioridade ba ita nia moris, tuir mai ita fó prioridade ba ita-nia kabun não é, ita-nia ekonomia. Daudaun ne’e apezar de Estadu de Emerjénsia iha, mas Governu flexibiliza i ita nia populasaun sira la’o, loja sira sei nakloke. Mas se ita boot sira haree iha fatin-fatin, nasaun seluk lockdown ne’e lockdown tebes ema iha estrada de’it mós laiha(…) Ita lae. Ita flexível tanba ita haree tenta uza medida ida bolu dehan proporsionál ho progresivu, ne’e hanesan ita sa’e eskada sama ida, rua, tolu, haat ne’ebé ha’u hanoin sei di’ak”, esplika Xefe Ezekutivu hafoin remata enkontru semanal ho Xefe Estadu, hodi hatán ba pergunta jornalista nian kona-ba preokupasaun komunidade nian ba estensaun Estadu Emerjensia ne’ebé bele implika liután ekonomia komunidade sira-nian.
Liután Xefe Governu realsa, la’ós Timor-Leste de’it mak afeta ba problema sósiu ekonómiku nian maibé mundu tomak kuaze hasoru problema ne’ebé hanesan, ezemplu; ema barak lakon empregu, konsumu tun, dezempregu aumenta, kresimentu laiha, família sira terus, maibé Governu sei la taka matan ba asuntu sira iha leten ne’e.
Ikus liu Xefe Governu husu ba komunidade atu tuir nafatin instrusaun sira ne’ebé hato’o hosi Ministériu Saúde kona-ba ijiene públiku, distansiamentu fíziku/sosiál, evita halibur malu iha grupu, tanba moras ne’e kontajiu maka’as hosi ema ba ema, no sai vulneravel tebes ba ema ho idade avansadu (terseira idade). HOTU