KOVID nu’udar asuntu esensiál ne’ebé ko’alia iha enkontru semanal Primeiru-Ministru TMR, no Prezidente Repúblika Lú Olo
Dili, loron 14 fulan-janeiru tinan 2021 – Sua Eselénsia Primeiru-Ministru Taur Matan Ruak kinta ne’e, hala’o enkontru semanal ho Sua Eselénsia Prezidente Repúblika, Dr. Francisco Guterres Lú Olo iha Palasiu Prezidente Nicolau Lobato, hodi informa kona-ba atividade governu nian liuliu situasaun KOVID-19, situasaun seguransa, no programa rekuperasaun ekonómika faze dahuluk nian ne’ebé la’o hela, sesta bázika.
“Ne’e enkontru semanal ho Sua Eselénsia señór Prezidente Repúblika atualiza de’it situasaun liuliu ba KOVID nian. Atualiza programa sesta bázika, atividade sira ne’ebé la’o dadauk no hanesan seguransa liuliu iha Estadu Emerjensia ne’e. KOVID daudaun ne’e hela ema na’in neen (6) i entaun Governu haree para revizaun oinsá mak flexibiliza ita-nia medida sira paraké ita-nia atividade sira bele la’o normal fila fali”, esplika Xefe Governu hafoin remata reuniaun ho Xefe Estadu.
Aproveita biban ne’ebá, jornalista sira husu kona-ba aviaun jet privadu rute Jakarta-Brisbane ne’ebé tun emerjensia iha aeroportu Prezidente Nicolau Lobato hodi husu atesta aftur, preokupasaun kompañia distributor sesta bázika ne’ebé ezije pagamentu no seluk tan. HOTU/M-GPM