PM-TMR Vizita Plataforma Bayu-Undan

 Dili, 6 Febereiru 2019: S.Exa. Primeiru-Ministru Taur Matan Ruak ho akompañadu hosi Prezidente Autoridade Nasionál Petróleu no Mineral (ANPM), Gualdino da Silva, Vise Prezidente ba Operasaun Perfurasaun no Kadeia Suprimentu hosi ConocoPhillips, David Boyle, Country Manager ConocoPhillips iha Timor-Leste, José Lobato no ekipa sira, tersa-feira ne’e hala’o vizita ba Plataforma Bayu-Undan, iha Tasi Timor.

Objetivu hosi vizita ne’e, atu bele hatene kle’an liu tan informasaun sira kona-ba prosesu esplorasaun iha Bayu-Undan ne’e rasik, ne’ebé konsidera hanesan seleiru Timor-Leste nian, ne’ebé hatama osan ba Estadu hodi sustenta mákina Estadu durante ne’e.

Hafoin hala’o tiha observasaun ba plataforma Bayu-Undan, Xefe Governu realsa,Governu Konstitusionál  da VIII determinadu loos, atu kontinua nafatin industria petrolífera liuliu iha Greater Sunrise, tanba daudaun ne’e la iha indústria seluk mak bele troka iha tempu badak no mediu prazu atu sustenta Estadu ida ne’e la ba oin iha próximu tinan 10 to’o 15 mai oin, tanba ne’e Governu enerjia loos, no sei orienta rekursu tomak ne’ebé Estadu iha hodi ajuda atu indústria petrolífera ne’e bele la’o.

“Timor-Leste determinadu loos, para atu kontinua nafatin indústria petrolífera ida ne’e, hanesan baibain ha’u hateten, la iha indústria seluk  sei troka industria petrolífera  iha tempu kurtu no mediu prazu  atu sustenta ita-nia  nasaun  ba próximo 10-15 anos, tanba ne’e ita-nia enerjia tomak, ita nia rekursu tomak sei orienta no ajuda para ke industria ida ne’e la’o, i sorin seluk, aproveita hodi dezenvolve área sira seluk, diversifika ita-nia ekonomia, ajuda ita nia kresimentu ekonómiku, kria empregu ba ita-nia sidadaun  sira ho objetivu ida de’it, halo nusa mak hadi’a  ita nia sidadaun sira-nia moris  lorloron, kria oportunidade barak para timoroan sira uza oportunidade sira ne’e  dezenvolve sira-nia na no sira nia moris”, dehan Xefe Governu.

Tanba ne’e, Xefe Governu husu ba timoroan sira atu haree industria petrolífera hanesan oportunidade báziku ne’ebé sei lori benefísiu ekonómiku boot ba Timor-Leste, Xefe Governu mós rekoñese katak daudaun ne’e sei  menus kampu serbisu ba timoroan, maibe Nia enkoraja timoroan sira atu esperansa nafatin no importante mak tenke insiste persiste no desiste, tanba loron oin mai sei di’ak liu ohin.

Enkuantu, Xefe Governu mós aproveita husu Timoroan sira ne’ebé daudaun ne’e serbisu iha Plataforma Bayu-Undan nian, atu buka aprende no prepara an di’ak liután hosi esperiénsia ne’ebé iha ona hodi prepara an mós ba projetu foun boot ne’ebé sei mai, Greater Sunrise.

“Viajen ida ne’e, mós hahú kontente tanba haree timoroan barak  serbisu iha ne’e, ne’e hanesan pasu primeiru ba aprendizajen , prepara an  di’ak liután ba futuru, agradese ba Conoco ne’ebé fó oportunidade ba timoroan sira, ajuda sira aprende iha pratika no esperiénsia rasik  hodi fahe filafali no prepara an  di’ak liután ba operasaun futuru ne’ebé iha oin mai, ezemplu Greater Sunrise, porké Timor-Leste determinadu loos, para atu kontinua nafatin indústria petrolífera ida ne’e”, dehan xefe Governu ba traballadór timoroan iha Bayu-Undan.

Sorin seluk, Xefe Governu mós sente orgullu no agradese ba jestór sira ConocoPhillips nian ho nia parseiru sira, ne’ebé halo jestaun di’ak loos iha Bayu-Undan durante tempu operasaun, hodi la hamosu insidente ruma boot ke prejudika ba atividade operasionál nian, no husu ba ConocoPhillips atu kontinua serbisu hamutuk ho parte Governu Timor-Leste hanesan parseria, liuliu ho Ministériu Petróleu no Rekursu Naturais(MPRM), ANPM no Timor Gap, kontinua prosesu refere  ne’e to’o fim.

Durante vizita oras hitu iha plataforma Bayu-Undan refere, Xefe Governu ho ekipa ConocoPhillips no Prezidente ANPM halo observasaun ba prosesu esplorasaun nian, rona esperiénsia timoroan sira ne’ebé serbisu iha kampu refere, hala’o enkontru kona-ba reuniaun revizaun negósiu nian no halo tour ba Produsaun sentrál Plataforma nian, vizita refere, remata ho han hamutuk na foto sesaun ho traballadór sira.

Inklui mós iha vizita refere, Espoza Primeiru-Ministru, Isabel da Costa Ferreira, Xefe Gabinete, Afonso H.F. Corte-Real, Vise Prezidente Dezenvolvimentu Sustentabilidade, Komunikasaun no Asuntu Esterna, ConocoPhillips nian, Kayleen Ewin no seluk tan. HOTU.