Loron 24 fulan-setembru tinan 2020

Komunikadu Imprensa

Mensajen felisitasaun husi Primeiru-Ministru  ba aniversáriu da-75 ezisténsia ONU nian

Tinan ida ne’e, Nasoins Unidas selebra aniversáriu da-75 ba ninia ezisténsia hanesan organizasaun ne’ebé ho karater no vokasaun mundiál.

Iha loron aniversáriu nian ne’e, ha’u hakarak hato’o ha’u-nia parabéns ba Sua Exelénsia Prezidente Asembleia Jerál Nasoins Unidas nian, Sr. Volkan Bozkir, no ba Sua Exelénsia Sekretáriu-Jerál, Sr. António Guterres.

Triste tebes tanba tinan festa ida ne’e, Asembleia Jerál Nasoins Unidas bele hasoru-malu liu de’it husi kontestu virtuál nian ida tanba COVID-19.

Ha’u aproveita biban ida ne’e hodi agradese ba observasaun sira enkorajamentu nian husi Sekretáriu-Jerál ONU nian, ba reforsu husi esforsu koletivu nian sira hanesan maneira únika atubele ultrapasa pandemia mundiál ida ne’e!

Haksolok tebetebes no ho grasa Maromak nian, mak Timor-Leste konsege evita propagasaun husi moras COVID-19.

Governu daudaun ne’e servisu ho empeñu no ho esforsu hodi hamenus impaktu negativu sira ne’ebé kauza husi moras ida ne’e, no prepara pakote rekuperasaun ekonómika nian ida, ba efeitu ida ne’e.

Ksolok Tinan nian ba Organizasaun husi Nasoins Unidas! REMATA