Mensajen hosi S.E. Primeiru-Ministru, Taur Matan Ruak ba Loron Mundial Profesór sira-nian

Palásiu Governu, loron 6 fulan-outubru tinan 2020

Loron 5 fulan-outubru nu’udar loron mundial ba profesór sira-nian iha mundu tomak, loron ne’ebé dedika espesiál ba profesór sira, ba sira-nia dedikasaun, empeñu no kontribuisaun hodi hanorin no eduka ita-nia sosiedade.

Profesór sira nu’udar eroi verdadeiru no eroi sem rekoñesimentu ne’ebé dedika sira-nia energia tomak hosi loron ba loron hodi atura no molda karater estudante sira hodi sai ema ne’ebé edukadu no iha valór ba ita-nia sosiedade no sai ema ne’ebé util ba nia povu no nasaun. Profesór sira mós nu’udar pilar importante ne’ebé transforma mundu.

Nune’e aproveita loron ne’e, hodi ha’u-nia naran rasik no lori VIII Governu Konstitusionál nian naran, hakarak hato’o parabéns ba profesór sira hotu iha teritóriu laran tomak, ba imi-nia loron espesiál ida ne’e. Governu sei kontinua halo esforsu para tau matan nafatin ba ita-boot sira no ita-nia sistema edukasaun iha rai laran, atu nune’e bele eleva ita-nia kualidade edukasaun.

Ikus liu, ha’u hato’o obrigadu wa’in ba profesór sira hotu, ba imi-nia dedikasaun, pasiénsia, persisténsia, responsabilidade no kariñu ne’ebé imi hatudu liuhosi imi nia hanorin no ezemplu hodi prepara recursos humanos ne’ebé ho kualidade  ba dezenvolvimentu no moris di’ak ita-nia nasaun nian. Obrigadu