Dili, loron 3 fulan-outubru tinan 2020 – Parlamentu Nasionál, sábadu ne’e aprova pedidu Xefe Estadu nian ba deklarasaun Estadu Emerjénsia ba dala 6º ba durasaun loron 30, ho votu aprovadu 55 kontra 0 no abstensaun 0 hosi prezensa deputadu nain 55, tuir deliberasaun Governu nian ba Xefe Estadu, atu fó kbiit ba Governu hodi kontinua halo kontrolu iha liña fronteriza ho Indonézia liuliu ba risku importasaun pandemia KOVID-19.

Iha plenária, Xefe Ezekutivu defende estensaun Estadu Emerjénsia ho motivu atu halo protesaun saúde públika, impede risku importasaun no risku propagasaun Kovid-19 iha komunidade nia lee, tanba haree ba númeru kazu iha país viziñu hanesan Indonézia no Austrália kontinua aumenta loron ba loron. 55,0,0

 “Iha nasaun seluk deklarasaun estadu emerjensia ne’e atu kombate moras depois kontajiu tama ona iha komunidade nia leet. Iha ita nia rain Deklarasaun Estadu emerjensia halo para reforsu ita-nia fronteira sira hodi impede importasaun moras mai ita nia rain, objetivu hanesan, mas estratéjia la hanesan. Dekretu Prezidente Repúblika nr. 59/2020, 3 setembru, termina nia validade iha oras 23h25m dia 4 outubru 2020 domingu aban, tanba ne’e Governu husu renovasaun dala ida tan ba períodu hanesan 30 dias, motivu ne’ebé atu justifika maka ba protesaun saúde públika ba risku importasaun no risku propagasaun iha ita nia rain hosi virus Kovid-19. Deklarasaun estadu Emerjensia ba dala 6º, ne’e ajuda ita tomak enfrenta situasaun ne’e hodi evita kontajiu iha komunidade nia leet”, defende Xefe Governu iha plenária.

Dezde pandemia global ne’e mosu dahuluk iha Sidade Wuhan-Xina iha final 2019, to’o a data (3/10) tuir organizasaun Mundial Saúde nian afeta ona pais 216 ho total infetadu millaun 34,817,852 no óbitu millaun 1,032,712, enkuantu Timor-Leste infeta ema na’in 28, 37 rekupera ona nain 27 no ida sei ativu iha hela observasaun Serbisu hospitalar no felizmente la iha óbitu.

Haree ba susesu Timor-Leste nian iha mitigasaun ba propagasaun Kovid-19, Primeiru-Ministru agradese ba hotu-hotu nia kolaborasaun liuliu ba populasaun sira-nia apoiu iha luta kontra kalamidade umana ida ne’e, hodi ohin Timor-Leste la iha óbitu hanesan nasaun sira seluk.

“Timor-Leste iha kazu 28, 27 rekuperadu ida ativu hela, no mate la iha, ida ne’e akontese tanba kolaborasaun ita hotu nian, ita-nia sidadaun sira nian hotu, identifika lalais kazu ne’ebé mai hosi rai li’ur, izola sira, impede sira-nia alastramentu ba ita-nia komunidade, elimina virus nia prezensa iha komunidade nia leet, tanba ne’e EE ne’e atu fó kbiit ba Governu kontinua reforsu nia kontrolu  ne’ebé la iha dalan seluk husu autorizasaun ba Sr. Prezidente Repúblika  ne’ebé ohin haruka nia mensajen mai Parlamentu Nasionál para deklara Estadu Emerjensia ba dala neen”, tenik

Haree ba evolusaun preokupante husi situasaun epidemiolójika no proliferasaun kazu kontájiu COVID-19 nian ne’ebé rejista ona, tantu iha nivel rejionál, no mós nivel mundiál, no ho hanoin atu evita no neutraliza risku sira husi propagasaun SARS-CoV-2 nian, nune’e bele proteje saúde públika no kapasidade resposta nian husi Sistema Nasionál Saúde, mak Governu delibera ona iha sorumutu Konsellu Ministru nian iha loron 23 fulan-setembru tinan 2020, hodi propoin ba Prezidente Repúblika atu husu Parlamentu Nasionál nia autorizasaun hodi fó-sai Deklarasaun Estadu Emerjénsia.

Entretantu Estadu Emerjénsia ba dalimak nian ne’ebé  hahú hosi loron 5 fulan-setembru ne’e, sei termina iha loron 4 fulan- outubru tinan 2020.HOTU