Dili, 13 Agostu 2019:  S.Exa. Primeiru-Ministru Taur Matan Ruak tersa-feira ne’e iha Palasiu Governu, hala’o enkontru kortezia ida ho Delegasaun Uniaun Europeia nian iha Timor-Leste, relativa ba misaun ida ne’ebé konduzida hosi peritu ida kona-ba “Analise ba desizaun Ekonómika (ADE-sigla Portugés), ne’ebé sei verifika finansiamentu Governu nian iha infraestrutura.

Iha enkontru ne’ebé  lidera hosi Embaixador Uniaun Europeia iha Timor-Leste, Alexandre Leitão, delegasaun introduz ba Xefe Governu kona-ba serbisu ADE nian ho suporta hosi Uniaun Europeia ne’ebé sei serbisu hamutuk ho Ministériu Planeamentu Investimentu no Estratéjiku (MPIE) hodi halo verifikasaun finansiamentu  Governu nian, maibé antes ne’e sei hala’o reuniaun mós  ho Membru Governu sira seluk, sosiedade sivíl no  workshop internasionál hodi partilla esperiénsia Timor-Leste nian, no iha fulan Setembru sei hato’o relatóriu sobre serbisu refere.

Iha oportunidade ne’e, Xefe Governu mós introduz polítika no programa prioridade sira Governu Konstitusionál da VIII nian ba delegasaun, tuir polítika PEDN no objetivu Dezenvolvimentu Sustentável ONU nian, hodi delegasaun sira bele apar polítika no prioridade sira Governu nian hosi tinan 2020-2023, nune’e wainhira ADE foti desizaun ruma tuir prioridade Governu nian relativa ho misaun EU nian iha Timor-Leste.

Entretantu Embaixadór Uniaun Europeia hateten, UE sei haree saida mak T9mor-Leste presija iha tempu oin mai  no oinsá bele enkuadra iha perspetiva finansiamentu hosi UE. HOTU