Dili, 19 Febereiru 2019: S.Exa. Primeiru-Ministru, Taur Matan Ruak, hateten nia seidauk bele fó solusaun ruma, kona-ba  desizaun hapara kontratu eis funsionáriu kontratadu sira iha Ministériu Edukasaun Juventude no Desportu (MEJD) hamutuk ema na’in 273, tanba  desizaun refere, nu’udar kompeténsia Ministra tutela nian ne’ebé lei mak atribui, tanba ne’e Xefe Governu husu ba eis traballadór MEJD nian  atu pasiénsia hein rezultadu diagnóstiku ne’ebé la’o hela iha Ministériu, ne’ebé tuir relatóriu  mai iha Gabinete Primeiru-Ministru katak sei termina iha loron 31 Marsu 2019. Xefe Governu hato’o ida ne’e ba reprezentante eis funsionáriu MEJD ne’ebé hetan akompañamentu mós hosi Sindikatu Traballadór Timor-Leste, Tersa-feira ne’e iha Palasiu Governu.

Hafoin rona tiha preokupasaun eis trabalhador MEJD nian, Xefe Governu fó konsellu ba eis traballadór sira ne’e, invés halo protestu no hanoin pontu negativu de’it ba desizaun ne’ebé Ministra foti tiha ona, ne’ebé ikus mai bele prejudika liután prosesu, di’ak liu harii Pontu Kontaktu ida ho pesoál ne’ebé kompetente no pasiénsia para halo diálogu ho ulun malirin nune’e bele hetan dalan win win solution.

Xefe Governu subliña, nia akompaña tebes problema eis trabalhador MEJD na’in 273, no preokupa ho asuntu refere, maibé hanesan Xefe Governu nia ho kuidadu tebes atu foti desizaun ruma, tanba lakohi ultra pasa lei no regulamentu ne’ebé iha, tanba ne’e Xefe Governu promete, wainhira diagnóstika hotu ona, nia prontu fó solusaun ba problema refere.

Entretantu Xefe Governu mós enkoraja eis traballadór sira, karik la satisfeitu ho desizaun Ministra nian, no la iha ona dalan diálogu, parte sira ne’ebé sente prejudika bele lori prosesu ne’e ba dalan justisa nian.
Durante iha enkontru, Eis Funsionáriu kontratadu sira lamenta ba Xefe Governu, kona-ba desizaun Ministra Edukasaun Juventude no Desportu, Dulce de Jesus nia desizaun ne’ebé hapara sira-nia kontratu.  HOTU