Segunda Semana Oin Komisaun Revizaun Orsamentu hahú haree Orsamentu kada Ministériu

 Díli, 18 Outubru 2018 – S. Exa. Primeiru-Ministru, Taur Matan Ruak, hala’o enkontru semanal, ba semana datoluk fulan Outubru nian ho Prezidente Repúblika, Dr. Francisco Guterres Lú Olo, Kinta-feira ne’e iha Palásiu Prezidente Nicolau Lobato, hodi informa situasaun país nian liuliu informa kona-ba preparativu OJE 2019 nian, ne’ebé iha semana oin Komisaun Revizaun Orsamental sei haree kada Ministériu nia orsamentu.

“Ne’e enkontru semanal ho Sr. Prezidente Repúblika informa situasaun estadu nian, liuliu preparativu ba Orsamentu Jeral 2019 nian. Hateten ba Sr. Prezidente katak komisaun revizaun orsamentu sei hahú iha segunda feira simu Ministériu sira hodi haree sira-nia orsamentu, ko’a iha ne’ebé, aumenta iha ne’ebé, tanba hotu-hotu hakarak osan entaun tenke halo kontensaun boot ida iha gastu ita-nian ba tinan oin”, dehan Xefe Governu ba imprensa sira, hafoin remata enkontru semana ho Xefe Estadu.

Entretantu hatán kona-ba ezekusaun OJE 2018 prosesu oinsá ona, Xefe Governu dehan ezekusaun hahú la’o ona, maibé iha difikuldade uitoan tanba ezekusaun ho tempu badak loos, fulan rua ho balun de’it, maibé Governu sei esforsu hodi ezekuta.

Kona-ba prioridade OJE ba 2019, Eis Xefe Estadu dehan, hosi tetu OJE 2019 $1.3 biloins ne’e, Governu sei tau prioridade ba bee moos, eletrisidade, agrikultura, saúde no infra-estrutura ne’ebé absorve maka’as ba OJE inklui transferénsia públika no saláriu-vensimentu.

HOTU