Dili, loron 21 fulan-janeiru tinan 2021 –  Sua Eselénsia Primeiru-Ministru Taur Matan Ruak, kinta ne’e hala’o enkontru semanal ho Prezidente Repúblika, Dr. Francisco Guterres Lú Olo, iha Palásiu Prezidente Nicolau Lobato, Bairru Pite-Dili, hodi informa kona-ba situasaun KOVID-19 no pedidu Governu nian kona-ba estensaun Estadu Emerjénsia ba dala 10º nian.

“Ne’e enkontru semanal ho Sua Eselénsia Señór Prezidente Repúblika, ami ko’alia asuntu rua de’it, ida mak kona-ba kontinuasaun estensaun Estadu Emerjénsia no ida seluk ko’alia kona-ba situasaun KOVID-19 iha ita-nia rain, hanesan ita-boot sira hatene, iha Dezembru 2020 ita iha kazu  pozitivu 15, horisehik tun mai 5   to’o loraik aumenta fali ida no daudaun ne’e ita iha kazu 6, no mós ko’alia uitoan kona-ba ita-nia esforsu oinsá mak  hetan vasina, asuntu ne’e mak ohin ko’alia”, esplika Xefe Governu ba jornalista sira hafoin reuniaun ho Xefe Estadu.

Liután xefe Governu esplika, iha enkontru ne’e, Xefe Estadu apoiu tebes polítika Governu nian ne’ebé atu halo triajen masal ba populasaun sira hodi halo prevensaun sedu no vasinasaun kontra KOVID-19 ne’e, inklui husu Governu atu kontrola liña fronteira ho rigorozu inklui husu Governu sensibiliza liután komunidade sira kona-ba perigu hosi surtu ne’e rasik.

Entretantu iha biban ne’e jornalista sira husu kona-ba triagem masal, prontidaun Xefe Governu nian atu simu uluk vasina konta KOVID-19 no asuntu seluk tan.