Dili, loron 4 fulan-juñu tinan 2020: Sua Exelénsia. Primeiru-Ministru Taur Matan Ruak, iha loron-kinta ne’e hala’o enkontru semanál ho Prezidente Repúblika, Dr. Francisco Guterres Lú Olo, iha Palásiu Prezidente Nicolau Lobato, iha Dili. Iha enkontru ne’e, Xefe Governu informa kona-ba situasaun jerál país nian inklui mós planu Governu nian kona-ba rekuperasaun ekonómika tanba pandemia surtu COVID-19, ne’ebé implika maka’as ba ekonomia nasaun nian. Liga ba ida-ne’e, Primeiru-Ministru husu asesór ekonomia Prezidente Repúblika nian, Dr. Rui Gomes, atu lidera ekipa ne’e. Aleinde ne’e, informa mós kona-ba prosesu pagamentu subsídiu ba umakain ne’ebé, Governu  liuhosi MSSI, fó sai ona ofisiálmente iha loron-kuarta  ne’e.

“Ohin enkontru semanál nian ho S.E. Prezidente da Repúblika, ha’u ko’alia liuliu asuntu tolu importante. Ida maka kona-ba situasaun jerál país nian kona-ba Seguransa. Ha’u hateten ba S.E katak buat hotu la’o di’ak maske problema ki’ikoan balu ne’ebé akontese. Ba daruak ha’u ko’alia kona-ba planu rekuperasaun ekonómika ne’ebé Governu hanoin atu prepara, no ba ida-ne’e, ha’u halo pedidu ida ba S.E. Prezidente da Repúblika atu autoriza Dr. Rui Gomes hodi lidera ekipa ne’ebé sei aprezenta planu da rekuperasaun ekonómika. No ba datoluk, ha’u informa ba S.E. Prezidente kona-ba atividade sira ne’ebé agora la’o daudauk kona-ba apoiu ba ita-nia sidadaun sira, medidas sira ne’ebé ita-boot sira rona kleur ona no iha komentáriu barak kona-ba $100. Ha’u hateten ba señór Prezidente Repúblika katak preparativu prontu ona, lansamentu halo ona no iha tempu loron hira tan sira sei halo implementasaun”, Xefe Ezekutivu  informa ba jornalista sira hafoin remata enkontru semanal ho Xefe Estadu.

Xefe Governu hateten mós katak Xefe Estadu aseita ona atu nia asesór Dr. Rui Gomes bele lidera ekipa rekuperasaun ekonómika ne’ebé Xefe Governu propoin hodi bele aselera prosesu rekuperasaun ekonómika. HOTU