Dili, 19 Outubru 2018:  S. Exa. Primeiru-Ministru Taur Matan Ruak, ne’ebé mós hanesan Prezidente ba Komité Revizaun Orsamental Polítika (KROP), sesta-feira ne’e prezide reuniaun téknika ida ho membru sira, iha salaun Ministériu Finansas nian.

Reuniaun ne’e, nu’udar faze preparativu atu elabora agenda no Kalendáriu diskusaun nian ba revizaun orsamental ne’ebé sei hahú iha Segunda feira semana oin to’o sesta-feira, iha salaun Ministériu Finansas.

Iha reuniaun revizaun orsamental refere, KROP sei simu audiénsia hosi kada Ministériu, Vise Ministériu, Sekretária Estadu sira no Ajénsia autónoma sira tuir kalendáriu ne’ebé trasa, hodi ida-idak aprezenta sira-nia razaun kona-ba proposta programa  ho nia orsamentu sira, hafoin ne’e KROP halo análize no tetu proposta refere hafoin  bele deside atu  aumenta, mantein ou hamenus.

Wainhira hala’o hotu ona revizaun, mak parte tékniku Ministériu Finansas nian sei halo redasaun final, hodi lori ba Konsellu Ministru atu halo aprovasaun nu’udar proposta OJE 2019 nian, hodi submete ba Parlamentu Nasional iha loron 8 fulan Novembru, tuir kalendáriu ne’ebé Governu prevé ona.

Prezidente KROP, mak atuál Primeiru-Ministru, Vise KROP, Ministra Finansas Interina, Sara Lobo Brites, membru sira mak hanesan, Ministru Estadu Prezidénsia Konsellu Ministru, Hermenegildo “Agio” Pereira, Ministru Obras Públika, Salvador Soares Pires, Ministru Agrikultura no Peska, Joaquim José Gusmão dos Reis Martins, observadorsira  mak; Ministru Reforma Lezislativa no Asuntu Parlamentar, Fidelis Leite Maglaães no Sekretária Estadu Igualdade Inkluzaun, Maria José da Fonseca Monteiro de Jesus enkuantu tekniku sira mak; hosi UPMA, Diresaun Jeral Ministeriu Finansas, ADN, KAFI, CNA no MPS. HOTU

#MediaGPM