Dili, 20 Novembru 2018:  S. Exa. Primeiru-Ministru, Taur Matan Ruak, simu iha audiénsia grupu Asosiasaun Emprezarial Feto Timor-Leste (AEMTL-sigla Portugés), ne’ebé mak xefia hosi Emprezária Carmen Araujo, Tersa feira ne’e iha Palasiu Governu, Dili.

Iha audiénsia refere, grupu AEMTL introdús ba Xefe Governu kona-ba sira-nia asosiasaun no ko’alia uitoan oinsá atu kolabora hamutuk ho Governu hodi partisipa iha atividade ekonómika para ajuda kontribui ba dezenvolvimentu nasionál.

Xefe Governu apresia ho ejistensia AEMTL nian no husu atu partisipa ativu iha prosesu dezenvolvimentu nasionál nu’udar emprezarial, tanba daudaun ne’e Governu Konstitusionál da-ualu iha prioridade tolu ne’ebé atu implementa, hanesan indústria petrolíferu, infraestrutura no inovasaun.

Xefe Governu mós apresia ho feto timoroan ne’ebé naklibur-an iha AEMTL, hodi hateten katak, envolvimentu feto iha vida emprezarial kontribui pasu pozitivu tebes no bele ajuda kontribui rendimentu familiar nian. HOTU