Dili, 30 Outubru 2018: S. Exa. Primeiru-Ministru Taur Matan Ruak, simu audiénsia Membru Konsellu Asesória Internasionál ba Sentru Nasional CHEGA (CNC-sigla Portugés), Segunda-feira ne’e iha Palasiu Governu Dili.

Iha enkontru ne’ebé akompañadu hosi Diretór Ezekutivu CNC, Hugo Fernandes ne’e, fó aprezentasaun Membru Konsellu Asesória Internasionál ba Xefe Governu kona-ba sira-nia prezensa iha Timor-Leste,  nu’udar oradór ba semináriu ida ne’ebé organiza hosi CNC, alem de atu ajuda oinsá internasionaliza sentru Nasionál CHEGA, tuir sira-nia peritu atu kontribui ba serbisu CNC nian iha futuru mai ho di’ak liután.

Iha enkontru ne’e, Xefe Governu agradese ba  membru konsellu asesória internasionál sira-nia disponibilidade ne’ebé ajuda Timor-Leste, espesiál CEHGA.

Membru Konsellu Asesória Internasionál na’in hitu ne’ebé nomeia hosi Eis Primeiru Ministru VI Governu Konstitusionál, Dr. Rui Maria de Araújo iha fulan Jullu 2017, ne’e mak hanesan Bispu Gunnar Stalsett (Noruega), Galuh Wandita Soedjatmoko (Indonézia), Pat Walsh (Australia), Prof. Trudy Huskamp Peterson (Estadu Unidu Amerika), Prof. Marisa Ramos Gonçalves (Portugal), Prof. David Webster (Kanadá) no Prof. Akihisa Matsuno (Japaun).

Sentru Nasionál CHEGA nu’udar Institutu Públiku(IP), kria liuhosi Rezolusaun Konsellu Ministru iha Outubru 2016. CNC tutela iha Gabinete Primeiru-Ministru nia okos, ho misaun atu prezerva memória pasadu nian nu’udar lisaun ba Povu Timor-Leste no umanidade tomak hodi hetan dame. HOTU