Dili, 28 Setembru 2018: S. Exa. Primeiru-Ministru Taur Matan Ruak, Kinta-feira semana ne’e iha Palasiu Governu, simu audiénsia Ministru Obras Públika, Salvador Pires.

Iha Audiénsia refere, Ministru Obras Públika relata ba Xefe Governu kona-ba serbisu MOP nian inklui informa tetu OJE 2019 ba MOP, ne’ebé tau prioridade ba konstrusaun estrada rural no bee moos iha territóriu tomak.

 “Ami ko’alia uitoan kona-ba tetu orsamentu no prioridade Obras Públika nian, ha’u esplika ba Primeiru Ministru, saida mak ami halo, haree uitoan seksaun estrada sira, investimentu ba bee-moos, estratéjia ne’ebé mak ita tenke adota no klasifikasaun projetu, area projetu, lokalizasaun iha Timor laran, no ita-nia Primeiru Ministru hanesan lider rezisténsia ne’ebé perkore ona Timor laran tomak, nia hatene kuaze ita-nia estrada, ita-nia rejiaun, ita-nia suku sira ne’e.

Sr. Primeiru Ministru hato’o kona-ba ligasaun rede estrada liuliu liga ho suku sira. Ne’e ba 2019 no ba tinan lima nia-laran, ne’ebé ami tenta atu komesa akumula projetu sira ne’e, seksaun estrada sira ne’ebé mak atu tau ba prioridade iha 2019, liuliu ba fundus infraestrutura ba tinan lima nia-laran, posibilidade mós ba fundus impréstimu, liuliu hanesan bee-moos, ita tenta atu halo investimentu boot para rezolve tiha ita-nia problema bee-moos, ligasaun infraestrutura bázika”, dehan Ministru Obras Públika, hafoin enkontru ho Xefe Governu. Hotu

#MediaGPM