Dili, 17 Jullu 2019:  S.Exa. Primeiru-Ministru Taur Matan Ruak, tersa-feira ne’e simu vizita delegasaun boot emprezáriu besik ruanulu hosi Austrália ne’ebé iha intrese hakarak halo investimentu iha Timor-Leste, delegasaun ne’e hetan akompañamentu hosi Embaixadór Austrália iha Timor-Leste, Peter Roberts.

Iha hasoru malu ho Xefe Governu ne’e, Embaixador Austrália introduz ba Xefe Governu grupu komérsiu Australianu nian ne’ebé hakarak atu  investe iha Timor-Leste.

Xefe Governu sente haksolok no fó benvindu ba delegasaun komérsiu Australianu ne’ebé iha intrese boot hakarak atu halo investimentu iha Timor-Leste, hodi hatutan Timor-Leste nia odamatan nakloke simu investimentu hosi nasaun ne’ebé de’it espesiál Austrália, nune’e bele ajuda Timor-Leste dezenvolve nia an no kria oportunidade empregu ba sidadaun sira.

Vizita delegasaun komérsiu Australianu iha Timor-Leste ne’e, hetan fasilitasaun hosi Embaixada Austrália nian iha Timor-Leste no Austrade.

“Hasoru malu ho Sr. Primeiru-Ministru ohin dadeer, embaixada Austrália kontente tebes bele fasilita grupu ida ne’e, inklui CEO no reprezentante kompañia barak hosi Austrália iha área oioin, hosi rekursu natural, aviasaun, meu ambiente no seluk tan, viajen ida ne’e atu suporta investimentu iha Timor-Leste no hametin relasaun komérsiu Timor-Leste ho Austrália. Oportunidade di’ak ba Austrália no Timor-Leste atu hametin ligasaun”, dehan Embaixadór Peter ba jornalista sira hafoin remata akompaña delegasaun komérsiu enkontru ho Xefe   Governu.

Durante estadia iha Timor-Leste aleinde hasoru malu ho Xefe Governu, delegasaun komérsiu ne’e sei hasoru malu mós ho Ministru Interinu Turizmu, Komérsiu no Industria, Dr. Agio Pereira, vizita TradeInvest Timor-Leste, Autoridade Nasionál ba Petróleu no Minerais (ANPM), Timor –GAP-EP. HOTU