PM TAUR MATAN RUAK SIMU VIZITA KORTEZIA NÚNSIU APOSTÓLIKU SANTA SÉ NIAN MAI TIMOR-LESTE
Dili, 17 Outubru 2018: S. Exa. Primeiru-Ministru, Taur Matan Ruak, simu vizita kortezia hosi Núnsiu Apostóliku Santa Sé nian mai Timor-Leste, Arsebispu Joseph Salvador Marino, tersa-feira ne’e iha Palasiu Governu Dili.
Iha enkontru refere, Xefe Governu no Núnsiu ko’alia kona-ba kooperasaun Igreja Katólika ho Governu Timor-Leste.
“Agradese ba Sr. Primeiru-Ministru tanba simu ha’u-nia vizita kortezia id ne’e. Ami na’in rua ko’alia barak kona-ba kooperasaun Igreja Katólika ho Governu Timor-Leste, atu serbisu hamutuk ba povu nia moris di’ak” dehan Núnsiu Apostóliku, hafoin remata enkontru ho Xefe Governu.
Vizita ne’e atu reforsa fila-fali relasaun ne’ebé iha ona, liuliu ba akordu bilateral ne’ebé hala’o tiha ona entre Governu Timor-Leste ho Santa Sé, ne’ebé iha akordu ne’e, Governu fó apoiu finanseira ba Igreja lokál hodi halo obra sosiál no edukasaun nian ba sidadaun sira ne’ebé Igreja mak administra.
Iha enkontru refere, Núnsiu Apostóliku ne’ebé hanesan mós Núnsiu Apostóliku ba Malaysia no Apostóliku delegadu ba Brunei, deseza ba Xefe Governu atu serbisu ho di’ak liután hodi serbí sidadaun sira, tanba kargu ne’ebé iha nu’udar responsabilidade boot ba nasaun. HOTU