Dili, loron 10 fulan-Agostu 2020: Sua Eselénsia Primeiru-Ministru Taur Matan Ruak, segunda ne’e iha Palasiu Governu, konvoka reuniaun ho liña ministerial sira ne’ebé ligadu ba implementasaun Estadu Emerjénsia ba etapa dahaat nian, hodi diskute kona-ba nia mekanizmu implementasaun nian, liuliu iha pontu entrada sira hanesan iha fronteira kona-ba entrada ema no sasán sira.

Tuir Xefe Ezekutivu katak, implementasaun Estadu Emerjénsia ba dala ida ne’e, la presija kria tan Sala Situasaun hanesan akontese ba kotuk, maibé reforsa de’it  mak papel Ministériu Saúde nian kona-ba medida sanitáriu sira ne’ebé estabelese ona, no Sentru Integradu Jestaun Krize (SIJK) kontinua fó akompañamentu, tanba  Estadu Emerjénsia atual aplika máximu liu  iha liña fronteriza sira hodi halo kontrolu rigorozu ba movimentasaun  ema nian atu  evita  pandemia Kovid-19  tama mai rai-laran.

Iha reuniaun ne’e mós konkorda proposta hosi Vise Ministru Interior nian kona-ba mudansa entrada ema tama mai teritóriu Timor-Leste, ne’ebé iha anterior, autoriza kada kuarta semana-semana ema tama teritóriu laran, enkuantu ho alterasaun ne’e, só autoriza de’it iha kada loron 17, entretantu kona-ba sasán nesesidade báziku nian, kontinua mantein despasu anterior nian, katak autoriza tama kada kuarta semana-semana. Mudansa ne’e, ho objetivu atu fó espasu ba Ministériu Saúde liuliu atu halo jestaun ba kuarentena, ligadu ba higiene no kapasidade kuarentena nian.

Governantes relevante ne’ebé mak hola parte reuniaun ne’e mak hanesan, Ministra Saude, Odete Maria Freitas Belo ho nia Vise, Bonifácio Maucoli dos Reis, Ministru Administrasaun Estatal, Miguel de Carvalho ho nia Vise, Lino de Jesus Torrezão, Ministru Defeza, Filomeno da Paixão de Jesus, Vise Ministru Interior, Antonio Armindo, Vise Ministru Negósiu Estranjeiru no Kooperasaun, Julião da Silva, no Vise Ministra Finansas,  Sara Lobo Brites, aleinde  hetan prezensa Diretor Sentru Integradu Jestaun Krize, Brigadeiru Jenerál  João Miranda “Aluk”. HOTU