Dili, loron 13 fulan-jullu 2020: Sua Eselénsia Primeiru-Ministru, Taur Matan Ruak, orienta nia Vise Primeiru-Ministru no Ministru Planu Ordenamentu, José Maria dos Reis, atu kria Sentru Integradu Planeamentu Teritorial liuliu ba kapitál Dili, hodi ba oin bele halo definisaun ida klara ba kapitál Dili ba tinan 50 oin mai, nia dispozisaun ne’e hela hanesan ne’ebé, tanba to’o agora seidauk iha definisaun ida klaru kona-ba kapitál Dili, nune’e ema ida-idak konstrui obra sira iha sidade Dili dezorganizadu no deskontroladu, tanba falta ordenamentu kapitál ne’ebé  definitivu.

“Hotu-hotu fadigadu ba planeamentu anual, mas planeamentu quinquenal, planeamentu longo prazu ita la iha. Ita iha Planu Estratéjia Dezenvolvimentu ne’e buat seluk ida. Ha’u lembra kuandu sei Prezidente fó Pose ba Ministru Planeamentu Investimentu Estratéjiku iha Lahane, iha ha’u-nia diskursu impressivo hateten, naran ne’e kapás loos, mas iha nia implementasaun la fasil. Ohin ita sei iha estudu de’it, tanba ne’e ita hare ita-nia dezenvolvimentu, ida-idak halo ninian, la iha integrasaun ida di’ak, ita halo baku rahun, halo baku rahun, ita frakasu iha planeamentu. Hori bainhira ha’u ko’alia ho Vise Primeiru-Ministru, José Reis dehan, ha’u hakarak iha ita-boot nia Gabinete Kria Sentru Integradu Planeamentu Teritorial, para ita hatene sidade Dili tinan 50 mai ne’e hanesan ne’ebé? Ministériu sira hela iha ne’ebé? área negósiu hela iha ne’ebé, abitasaun hela iha ne’ebé? Selae hanesan agora Ministériu ho populasaun hadau malu rai, tanba ita la iha definisaun ne’ebé klaru”, dehan Xefe Ezekutivu foin lalais ne’e.

Eis Xefe Estadu ne’e hatutan, presija planeamentu ba tempu naruk nian, no iha nia implementasaun mak breakdown ba tinan lima no breakdown ba tinan ida-ida, nune’e dezenvolvimentu bele sai sistemátiku no planeadu di’ak, aleinde fó dalan ba kontrolu ne’ebé di’ak. Xefe Ezekutivu ne’e nota katak, durante ne’e sei falta planeamentu integradu, nune’e Ministériu ida ba halo obra ida, Ministériu seluk ba sobu hodi estraga de’it osan. HOTU/GPM