Primeiru-Ministru Taur Matan Ruak Dejeza Susesu Ba Embaixadór Foun Sira Ne’ebé Hetan Pose
Dili, 28 Janeiru 2020: S.Exa. Primeiru-Ministru Taur Matan Ruak, tersa-feira ohin iha Palasiu Governu, simu Embaixador foun na’in sia (9) ne’ebé ohin hetan ona Pose hosi Prezidente Repúblika, Dr. Francisco Guterres Lú Olo, iha Palasiu Prezidente Nicolau Lobato, ne’ebé sei reprezenta Timor-Leste iha misaun diplomátika nian ba nasaun amigu sira.
Iha durante enkontru refere, Xefe Ezekutivu dejeza susesu no apela ba Embaixadór foun sira atu inteira didi’ak nivel kooperasaun atual nian no perspetiva ba oin, hodi nune’e bele hametin di’ak liután nivel kooperasaun bilateral nian, hodi lori benefísiu ba Timor-Leste.
Xefe Governu mós husu ba diplomata foun sira ne’e, atu mantein liña kontaktu di’ak ho Ministériu Negósiu Estranjeiru iha hala’o misaun diplomasia nian.
Enkuantu, Emposadu sira agradese tebes ba konfiansa Xefe Governu nian ne’ebé depozita ona sira nia naran ba Xefe Estadu hodi nomeia nu’udar Embaixadór, aleinde ne’e, emposadu sira ne’e promete ba Xefe Governu katak, sira sei hala’o esforsu hotu atu halo kooperasaun ho país ne’ebé sira sei destina ba nune’e bele benefisia Timor-Leste.
Entretantu Embaixador sira ne’ebé hetan pose no ohin hasoru malu ho Xefe Governu mak hanesan;
- Embaixadora Maria Natália Guterres Viegas Carrascalão, ba Repúblika Singapura hodi troka Adaljiza A.X.R Magno;
- Embaixadór Hermenegildo Lopez, ba Reinu Kamboja hodi troka Felicidade de Sousa Guterres;
- Embaixdora Juvita Rodrigues Barreto de A. Gonçalves, ba Santa Sé (Vatikanu) hodi troka Egas da Costa Freitas;
- Embaixadór Abrão dos Santos, ba Repúblika Populár Xina, hodi troka Bendito dos Santos Freitas,
- Embaixadora Isabel Amaral Guterres, ba Repúblika Portugéza, hodi troka Maria Paixão de Jesus;
- Embaixadora Maria Renata Caldas de Jesus, ba Repúblika Demokrátika Popular Laos, hodi troka Maria Natália Guterres Viegas Carrascalão ne’ebé hetan fali pasta ba Singapura;
- Embaixadora Inês Maria de Almeida, ba Commonwealth Austrália hodi troka Abel Guterres;
- Embaixadór Gil da Costa, ba Reinu Unidu no Irlanda Norte, hodi troka Joaquim Fonseca; no
- Embaixadór Ilídio Ximenes da Costa, ba Estadu Japaun hodi troka Filomeno Aleixo da Cruz.
HOTU