Primeiru-Ministru Taur Matan Ruak Enkontru Kortezia Ho Eis Xefe Misaun UNAMET, Ian Martin
Dili, 22 Agostu 2019: S. Exa. Primeiru-Ministru Taur Matan Ruak, kinta-feira ne’e iha Palasiu Governu, simu vizita kortezia Eis Reprezentante Espesiál Sekretáriu Jerál ONU nian ba Nasoins Unidas Nia Misaun iha Timor-Leste (United Nations Mission in East Timor-UNAMET 1999), Ian Martin, ne’ebé to’o Timor-Leste kuarta-feira horisehik, iha ámbitu atu partisipa komemorasaun tinan 20 Referendu no Misaun INTERFET, ne’ebé sei festeza iha loron 30 fulan Agostu 2019.
Iha enkontru ne’ebé hala’o besik oras rua ne’e, Xefe Governu ho Eis Xefe Misaun UNAMET fahe hanoin no esperiénsia sira hodi hanoin filafali akontesimentu sira ne’ebé akontese iha pasadu tinan 1999 antes no hafoin Referendu.
Remata enkontru ba jornalista Sira, eis Xefe Misaun UNAMET Ian Martin sente kontente tebes bele vizita filafali Timor-Leste hafoin tinan 20.
“Bondia, ha’u iha oportunidade mai ko’alia ho Sr. Primeiru-Ministru. Ha’u fila fali mai Timor-Leste atu partisipa komemorasaun Konsulta Popular. No sei haree eventu ofisiál barak, mas antes ne’e ha’u iha oportunidade atu viajen hodi haree dezenvolvimentu iha nasaun laran”, dehan Ian Martin ba jornalista sira.
Eis Xefe misaun UNAMET to’o iha Dili via Darwin kuarta-feira ne’e, no nia prezensa iha Timor-Leste atu partisipa iha komemorasaun tinan 20 Referendu, ne’ebé Governu Timor-Leste sei realiza eventu boot iha loron 30 fulan Agostu 2019. Iha komemorasaun refere, konvida bainaka importante sira hosi nasaun oioin, hanesan Xefe Estadu, Xefe Governu, eis funsionáriu UNAMET tantu lokál no internasionál no reprezentante ativista rai-li’ur sira ne’ebé iha tempu okupasaun fó apoiu ba Timor-Leste nia luta. HOTU
