Dili, 29 Agostu 2019: Dili, 29 Agostu 2019: S.Exa. Primeiru-Ministru Repúblika Demokrátika Timor-Leste, Taur Matan Ruak aproveita meius públiku ne’e, hato’o bem-vindu ba bainaka konvidadu sira hosi nasaun 38 ne’ebé to’o ona iha Timor-Leste hodi hatán ba konvite atu partisipa iha komemorasaun tinan 20 Referendu (Konsulta Popular no Misaun INTERFET) ne’ebé serimónia topu sei realiza iha Tasi Tolu, sesta lokraik semana ne‘e, loron 30 fulan Agostu 2019.

“Aproveita oportunidade ida ne’e, fó bem-vindu no saudasaun espesiál ba ita-nia konvidadu sira tomak ne’ebé ita konvida hosi nasaun 38, balun Xefe Estadu, balun Xefe Governu, balun reprezentante no enviadu espesiál  no balun ita-nia amigo sira ke uluk  serbisu ho ita  barak ohin mai emosaun ho ita, haree ba kotuk no haree ba agora  sira emosaun loos, ita hakat liu tinan 20  haree fotografia sira uluk ita fuuk sei metan oin kabuar, ohin ita oin oin-seluk mas energia iha nafatin”,  Primeiru-Ministru Taur Matan Ruak.

Bainaka konvidadu sira hamutuk ema na’in 402 daudaun ne’e to’o hotu ona iha Timor-Leste hosi nasaun 38 : VVIP ema na’in 6, VIP nivel Ministru na’in 24, Delegasaun anexa ba VVIP no VIP na’in 49, Delegasaun seluk nain 123, Korpu Diplomátiku non rezidente na’in 17, Korpu Diplomátiku rezidente no Organizasaun Internasionál na’in 21, Forsa Defeza anexa hosi Austrália no Nova Zelandia na’in 23, Ativista ba Diretu Umanu na’in 12 no Amigu Timor-Leste-Alemaña na’in 3. HOTU