Dili, loron 12 fulan Juñu 2020:  S.E. Primeiru-Ministru Taur Matan Ruak, sesta-feira ne’e iha Palasiu Governu, fó pose ba eis Sekretáriu Rejionál Autoridade Rejiaun Administrativa Espesiál Oekusi-Ambenu (RAEOA), Arsénio Paixão Bano nu’udar Prezidente foun RAEOA hodi troka nia antesesór Dr. José Luís Guterres ho baze iha Rezolusaun Governu nr.20/2020, loron 10 fulan Juñu.

Iha intervensaun hafoin fó tiha pose, Xefe Governu esplika, nomeasaun no ezonerasaun Prezidente Autoridade RAEOA nu’udar prerogativa Governu nian ne’ebé mak atribui hosi Lei nr.3/2014, loron 18 fulan Juñu, alteradu hosi Lei nr.3/2019, loron 19 fulan Agostu, nune’e Governu liuhosi Konsellu Ministru iha loron 10 fulan Juñu 2020, deside ezonera Dr. José Luís Guterres no nomeia Arsénio Paixão Bano hodi troka nia pozisaun.

Nune’e aproveita biban refere, eis Prezidente Repúblika ne’e, hato’o agradesimentu boot ba Prezidente Autoridade sesante RAEOA, José Luís Guterres ba nia kontribuisaun ne’ebé halo ona durante asumi kargu, mezmu ho de’it tempu badak lidera RAEOA.

“Ha’u hakarak aproveita oportunidade fó parabéns, saudasoins espesiál, agradesimentu boot ba Dr. José Luís Guterres. Dr. José Luís Guterres nia asumi knaar iha momentu ida conturbado  politicamente iha ita-nia rain, laos de’it ida ne’e, ho COVID ne’ebé mosu iha ita-nia rain afeta ita-nia populasaun sira i halo nia esforsu tomak ba kria nia ekipa para bele tuir nia kondisoins, kapasidade, possibilidades bele fó ninia kontribuisaun, infelizmente ninia mandatu termina mas nia husik hela mós ninia kontribuisaun ida tanba ne’e ha’u pesoalmente hanesan Primeiru-Ministru, ha’u hakarak agradese ba nia, nia ekipa i ba ninia família tomak”,  dehan Xefe Ezekutivu.

Enkuantu ba Prezidente foun Autoridade RAEOA, Xefe Governu dezeja votu parabéns no husu Prezidente foun RAEOA atu uza pozisaun ne’ebé iha hodi halo dezenvolvimentu ba Oekusi tomak, ho rekursu finanseiru uitoan ne’ebé Estadu iha hodi konsentra ba povu nia nesesidade. Liután Xefe Governu akresenta, Governu Sentrál sei kontinua fó apoiu tomak ba dezempenamentu iha Oekusi-Ambenu.

Ikusliu, Xefe Governu mós apela ba atoni-oan sira atu hamutuk hodi lori Oekusi ba oin.

“Ha’u husu para Oekusi oan sira hamutuk ida de’it, la’ós de’it iha ibun mas liuliu iha hahalok i hotu-hotu tau matan para apoiu sidadaun sira que ita-boot sira-nia inan aman rasik, família rasik iha ne’ebá laiha ida númeru um, laiha ida númeru dois e tão pouco iha númeru três, hotu-hotu atoni, hotu-hotu ema ida de’it, hotu-hotu timoroan i señór Prezidente, sira hotu iha ita-boot nia liman, ita boot mak kondutór, ita boot mak pilotu, aviaun riba tun responsabilidade ita boot nian, ró mout responsabilidade ita boot nian, karreta soké responsabilidade ita boot nian ami sira apoiu de’it determinante mak ita boot Señór Prezidente no ita-boot nia ekipa ne’ebé desejo boa sorte”, apela Xefe Ezekutivu.

Entretantu ba jornalista sira, Xefe Ezekutivu reafirma, ezonerasaun ba José Luís Guterres hosi kargu Prezidente Autoridade RAEOA, nu’udar konsekuénsia hosi konjuntura polítika foun ne’ebé akontese iha Parlamentu Nasionál no ne’e hanesan prosesu normal iha Estadu direitu demokrátiku.  

Hola parte iha toma pose ne’e, mak hanesan, Ministru Prezidénsia ba Konsellu Ministru, Fidélis Leite Magalhães, Ministru Asuntu Parlamentar no Komunikasaun Sosiál, Francisco Jerónimo no familiares emposadu nian.  HOTU