Dili, 5 Setembru 2019: S.Exa. Primeiru-Ministru Taur Matan Ruak ohin hato’o sentidu kondolénsia ne’ebé kle’an ba família enlutada, saudozu Lucas da Costa “Rama Metan”, Reitor Universidade da Páz, no Fundadór RENETIL, ne’ebé husik ona mundu iha kinta-feira, loron 5 fulan Setembru 2019 oras tuku 8.00 OTL iha Ospitál Nasionál Guido Valadares (HNGV), tanba sofre moras cancer de colo.

“Sente triste rona notísia ida ne’e, Timor-Leste lakon timoroan matenek di’ak ida ne’ebé dedika nia an tomak ba área edukasaun hanesan Reitór UNDIL no UNPAZ hodi kontribui ba ita-nia rekursu umanu. La’ós ne’e de’it, iha tempu okupasaun, nia mós kontribui ba ita-nia nasaun nia luta liuhosi RNETEIL, hodi ohin ita sai nasaun ida livre no independente. Aproveita okaziaun ne’e hakarak hato’o ha’u-nia sentidu profundu kondolénsia ba família saudozu nian ne’ebé triste hela tanba lakon ema di’ak hosi sira-nia leet. Ita hotu reza ba nia atu nia alma simu iha Nai nia Kadunan Santu moris rohan la’ek hodi kontinua tau matan ba nia família no ita hotu hodi kontinua obra ne’ebé nia husik hela iha mundu ne’e”, Primeiru-Ministru, Taur Matan Ruak. HOTU