• Atualiza pontu tolu liga ba situasaun KOVID-19

Díli, loron 18 fulan-febereiru tinan 2021 – Sua Eselénsia Primeiru-Ministru Taur Matan Ruak, iha kinta-feira dadeer hala’o enkontru ordinária semanal ho Sua Eselénsia Prezidente Repúblika, Dr. Francisco Guterres Lú Olo, iha Palásiu Prezidente Nicolau Lobato, Bairru-Pite, hodi atualiza atividade Governu nian semana ikus ne’e,  liuliu kona-ba planu estensaun Estadu Emerjénsia tan, situasaun iha fronteira ne’ebé sai preokupante ba Governu tanba númeru pasajen ilegal tama-sai fronteira kontinua aumenta, no preparativu Governu nian ba vasinasaun.

“Ne’e enkontru semanal ho Sua Eselénsia Señór Prezidente hodi atualiza atividades Governu nian mas liuliu kona-ba KOVID nian, relasaun ba KOVID nian iha asuntu tolu mak ha’u atualiza ba Sua Eselénsia Señór Prezidente, ida mak kona-ba estensaun Estadu Emerjensia ké Konsellu Ministru deside para fulan oin ne’e ita kontinua halo estensaun, ida seluk ne’e kona-ba situasaun fronteira nian hanesan ita-boot sira hatene, ita-nia númeru kazu ne’e aumenta, iha entrada ilegál sira ne’ebé deskontrolu uitoan ké tama iha komunidade sira nia leet i agora daudaun ne’e halo hela teste iha Munisípiu Bobonaro ho Kovalima para hasai ezemplu para iha serteza ne’e keta kontajiu komunitária ne’e iha ona ka lae? Ida seluk mak atualiza mós ba Sua Eselénsia Señór Prezidente kona-ba preparativus ba vasina nian oinsá mak ita esforsu atu halo vasina ba ita-nia sidadaun sira iha tempu oin mai ne’e”, esplika Xefe Governu ba Jornalista sira hafoin remata enkontru ho Xefe Estadu.

 Entervista kompletu haree iha ne’e : https://www.gpm.gov.tl/tl/3213-2/#.YC42VGgzaUk

Kona-ba pasajen ilegál ne’ebé kontinua ultra pasa fronteira ne’ebé bele fó risku ba komunidade lokál, Xefe Governu esplika, Ministériu Saude liuhosi Ekipa Pilar KOVID-19, daudaun ne’e iha Munisípiu Bobonaro no Kovalima hodi halo teste ba pesoál sira ne’ebé deskonfia halo kontaktu fíziku ho kruzador ilegal sira, atu bele deteta sedu hodi nune’e prevene lalais kontajiu lokál. HOTU