Dili, loron 16 fulan Juñu 2020: S.E. Primeiru-Ministru Taur Matan Ruak, segunda-feira ne’e hala’o enkontru semanal ho Prezidente Repúblika, Dr. Francisco Guterres Lú Olo iha Palasiu Prezidente Nicolau Lobato, Dili, hodi informa kona-ba atividade governativa nian no situasaun jerál país nian, iha okaziaun ne’e informa kona-ba roo peska estranjeiru ho tripulante na’in 14 hodi Indonézia no Vietname ne’ebé mak tasi baku sai (encalhado) mai iha illa Jaku, Munisípiu Lautem nian, aleinde informa mós kona-ba  pagamentu subsídiu ba  uma kain sira ne’ebé daudaun ne’e la’o hela no atividade sira ne’ebé fazeadamente   hahú la’o normal fila fali tanba COVID-19  iha rai-laran daudaun ne’e livre ona.

“Ne’e enkontru semanal i informa atividade Governu nian i ohin ne’e ha’u ko’alia asuntu rua de’it, ida mak asuntu kona-ba seguransa país nian ne’ebé informa ba Sua Exelénsia katak ita kaptura roo ida iha illa Jaku ne’ebé sidadaun Indonézia no Vietname iha laran, sanulu resin, daudaun ne’e ita foti sira tau kuarentena depois investiga haruka sira fila fali ba sira-nia rain. Segundu mak kona-ba implementasaun subsídiu ne’ebé mak ita fó ba ita-nia sidadaun sira buat hotu la’o di’ak, ita prevee katak iha dia 23 remata, dia 25 sira sei halo relatóriu final ba Governu. No terseiru kona-ba situasaun Estadu Emerjénsia. Ita agora kazu la iha, situasaun kontinua normal, reforsa de’it ita-nia kontrolu iha fronteira sira, mas atividade hotu-hotu iha ita-nia rain normaliza fila fali inklui projetu sira ne’ebé presija hala’o”, informa Xefe Ezekutivu ba jornalista sira hafoin reuniaun semanal ho Xefe Estadu. HOTU/GPM