Primeiru-Ministru Taur Matan Ruak Kongratula Inisiativa Igreja Nian Ne’ebé fó Apoiu Moral, Psikolójiku no Espiritual ba Suspeitu Kazu COVID-19
Dili, 28 Abril 2020: S.Exa.Primeiru-Ministru Taur Matan Ruak, tersa-feira ne’e hala’o enkontru ho Arsebispu Arquidioseze Metroplitanu Dili nian, Dom Virgílio do Carmo SDB, iha Kámara Eklesiástika Dili, ho akompañadu Pe. Ângelo Salsinha no Madre Guilhermina.
Enkontru ne’e nu’udar inisiativa hosi Arsebispu Dom Virgílio do Carmo SDB nian, ho objetivu atu husu Xefe Governu nia apoiu no apresiasaun ba inisiativa Arquidioseze Metropolitanu Dili nian ne’ebé hakarak atu fo kontribuisaun hodi fó apoiu akonsellamentu moral, psikolójika no espiritual ba suspeitu Covid-19 ne’ebé presija tebes iha situasaun ida ne’e.
“Bom dia ba media sira enkontru ida ne’e inisiativa husi ami Dioseze ninian tanba iha semana hira nia laran ami rona katak husi ekipa Covid ninian dalaruma sempre temi kona-ba atu fó apoiu espiritual, apoiu psikolójiku, moral, ba ita nia maluk sira ne’ebé hetan moras no iha fatin izolamentu no kuarentena hela entaun ami koko atu tuur hamutuk hodi forma ekipa oan ida. Dioseze forma hela ekipa oan ida ne’e, atu aprezenta ekipa ida ne’e ba iha ekipa Governu ninian ne’e mak ami hakbesik no tanba ita-nia Primeiru-Ministru mak xefia ekipa ida ne’e entaun ami hakarak atu ba maibé ami agradese tebetebes ohin ita nia Primeiru-Ministru mak ho haraik an tomak mai iha ne’e loloos ami mak atu ba maibé ita nia Primeiru-Ministru mak hili atu mai to’o iha ne’e atu nune’e ami bele aprezenta de’it ba sira ekipa oan ida ne’e. Ekipa ne’e prontu se karik ekipa Governu nia presiza karik apoiu ruma ne’ebé husi uma kreda ninian liuliu apoiu moral, espiritual ninian ami mós iha ona ekipa ida ne’ebé bele fasilita ne’ebé kompostu husi Padre, Madre, irmaun sira ne’ebé prontu atu servisu hamutuk iha ekipa ida ne’e”, esplika Dom Virgílio do Carmo SDB ba jornalista sira hanoin remata enkontru ho Xefe Governu.
Entretantu Xefe Governu apresia no kongratula ideia Arquidioseze Metropolitanu Dili nian ne’e, no promete sei follow up ho ekipa Sala Situasaun, Sentru Integradu Jestaun Krize atu bele serbisu hamutuk hodi fó akonsellamentu ba suspeitu kazu COVID-19 ne’ebé presija tebes.HOTU