Kelikai, loron 21 fulan agostu tinan 2021 – Sua Eselénsia Primeiru-Ministru Taur Matan Ruak, afirma, Governu ne’ebé nia lidera konsidera papel Sosiedade Sivíl sira-nian importante iha Estadu Direitu Demokrátiku, tanba bele hala’o kontrolu sosiál ba asaun Governu nian, inklui bele evita arbitrariedade no prepoténsia Governu no Estadu nian.

“Ha’u konsidera Sosiedade Sivíl hanesan parseiru ida importante ba Estadu direitu demokrátiku.[…] Sosiedade Sivíl sira-nia papel síviku ne’e importante loos, tanba saida? Ne’e evita arbitrariedade, evita prepoténsia abuzu de poder. Nasaun sira ne’ebé kuandu sosiedade fraku ne’e, Governu no Estadu ne’e prepotente, abuzu nia poder, entaun ita presiza sosiedade ida ké kritiku, mais iha kritériu balun ké tenke kontribui ba bem komún. I papel Sosiedade Sivíl nia di’ak mak ida ne’e, kontribui ba bem komún, defende sira ne’ebé labele ko’alia, tanba Governu labele marka iha fatin hotu-hotu no haree buat hotu-hotu”, dehan Xefe Governu liuhosi intervensaun iha retiru nasionál Governu ho Sosiedade Sivíl ho tema “ Hamutuk Ita Hametin Parseiru Krítiku Hodi Define Progresu Ba Dezenvolvimentu Nasionál”, ne’ebé mak organiza hosi Forum ONG Timor-Leste ka FONGTIL, sábadu semana kotuk ne’e iha Waibitai (foho matebian feto-mane nia klaran] Postu Administrativu, Kelikai, Munisipiu Baukau.

Liután Xefe Governu esplika; “Buat ne’ebé laloos sira (sosiedade sivíl) kritika, kritika ne’e di’ak tanba sé mak kritika ne’e o nia amigu, simu hanesan forma pozitivu, para ita bele iha abertura, iha fatin simu ema seluk nia ideia, se la iha sentimentu ida ne’e, ita haree ema hotu ita-nia inimigu”.

Entretantu iha retiru ne’e, Xefe Governu mós fahe nia vizaun kona-ba Estadu, foku governasaun ne’e nian no dezafiu sira ne’ebé Governu ne’e hasoru.

Hola parte iha retiru ne’e, Vise Prezidente Parlamentu Nasionál, Maria Angelina Lopes Sarmento ho deputadu balun,  Ministru Finansas, Rui Gomes, Ministru Administrasaun Estatal, Miguel Pereira de Carvalho, Ministru Edukasaun Juventude no Desportu, Armindo Maia,  Ministru Petróleu No Rekursu Mineral, Victor da Conceição Soares , Ministru Turizmu Komérsiu no Industria,  Jose Lucas do Cramo da Silva, Vise Ministru Agrikultura no Peska no Sekretáriu Estadu Arte no Kultura, Korpu diplomátiku balun,  Prezidente Autoridade Munisípiu Baukau,  lider komunitária sira  no komunidade sira hosi Postu Kelikai no Baguia inklui, entidade sira seluk.  HOTU

#MediaGPM