Dili, loron 2 fulan-juñu 2020:  S.Exa. Primeiru-Ministru, Taur Matan Ruak, iha loron-tersa ne’e, iha Palásiu Governu, konvoka reuniaun ida ho reprezentante sira husi organizasaun multilaterál iha Timor-Leste ka Parseiru Dezenvolvimentu nian sira, hanesan Koordenadór Rezidente ONU nian iha Timor-Leste, Banku Mundiál, no PNUD.

Iha enkontru ne’e, iha ne’ebé marka mós prezensa husi Ministru Finansas, Fernando Hanjam, no Ministru Prezidénsia Konsellu Ministrus, Fidélis Leite Magalhães, Xefe Ezekutivu hahú ho introdusaun ba parseiru dezenvolvimentu sira kona-ba vizaun no orientasaun polítika iha prioridade sira ba dezenvolvimentu nasionál, nune’e Governu ho Parseiru Dezenvolvimentu nian sira bele konsentra di’ak liután ba prioridade sira ne’ebé Governu trasa ona iha nia programa ne’ebé atu alkansa durante ninia mandatu.

“Objetivu husi reuniaun ida-ne’e mak atu, uluk nana’in rona vizaun no orientasaun polítika kona-ba prioridade dezenvolvimentu Timor-Leste nian husi Exelénsia Primeiru-Ministru. Ho nune’e bele loke dalan ba oin, atu nune’e iha mandatu Governu VIII ida-ne’e nian bele halo konsertasaun di’ak liután ba iha prioridade ba dezenvolvimentu nian iha ne’ebé ita mós bele kapitaliza apoiu husi parseiru dezenvolvimentu sira. Iha kontestu ida-ne’e, ita haree husi parte PCM nian, ajuda para atu tradús vizaun boot hirak ne’ebé Sr. Primeiru-Ministru hato’o ba asaun iha liña ministerial sira”, Ministru Prezidénsia Konsellu Ministrus, Fidélis Leite Magalhães dehan ba media sira, hafoin reuniaun.

Entretantu, hafoin remata reuniaun ho Xefe Governu, Ministru Prezidénsia Konsellu Ministrus, Ministru Finansas no Parseiru sira, kontinua reuniaun hodi aborda liután vizaun no orientasaun polítika hosi Xefe Governu nian, oinsá atu Ministériu sira bele implementa asaun sira ne’e tuir liña orientasaun ne’ebé hatuur ona. HOTU