Primeiru-Ministru Taur Matan Ruak lansa deskaregamentu mákina crane kontentór iha Portu Foun Tibar
Dili, loron 16 fulan maiu tinan 2022 –Sua Eselénsia Primeiru-Ministru Taur Matan Ruak, hamutuk ho Ministru Finansas Rui Gomes, Ministru Transporte no Komunikasoins, José Agostinho, Ministru Obras Públika, Abel da Silva Pires, Vise Ministru Finansas, Antoni Freitas, no responsável hosi Empreza Timor Port nian, segunda loraik ne’e iha Portu Foun Baia Tibar, hala’o lansamentu deskaregamentu ba ekipamentu pezadu Ship-to-Shore Cranes no RTGs Cranes ne’ebé to’o ona iha Portu, ne’ebé sei utiliza ba karegamentu-deskaregamentu kontentór sira iha Portu foun Tibar ne’ebé tuir planu sei funsiona, iha fulan setembru-outubru tinan ne’e.
Iha intervensaun Xefe Governu fó parabéns no agradese ba CEO Timor Port ho parseiru sira hotu ne’ebé halo ona esforsu maka’as hodi projetu boot ida ne’e hatudu progresu ho to’o ona (chegada) ekipamentu pezadu ba karega-deskarega kontentór sira, maske hasoru situasaun pandemia COVID-19.
“Loron haat tan Timor-Leste kompleta nia vigésimo aniversáriu ba restaurasaun independénsia, iha 19 kalan iha mós serimónia importante boot ida ne’ebé tranzisaun husi S.E. Prezidente eleitu toma pose no sesta ofisíalmente mandatu S.E. Prezidente atual. Momentu importante no istórika loos ho chegada ró ida ne’e aproximadamente 300 metru, ha’u hanoin primeira vez ró boot ida hanesan ne’e atraka iha ita-nia portu ho ekipamentu ida ne’ebé aban bainrua sei fasilita ita-nia operadór sira iha portu ida ne’e, ha’u espera katak ida ne’e sei ajuda maka’as liu dezenvolvimentu ekonómiku ita-nia nasaun nian no fasilita di’ak liu ita-nia komérsiu internasionál, tanba ne’e parabéns ba Timor Port”, dehan Xefe Governu.
Liután Xefe Governu akresenta Governu ne’ebé nia lidera, sei kontinua buka serbisu hamutuk no kolabora atu ajuda viabiliza projetu ne’e bele la’o susesu to’o nia prosesu operasionalizasaun.
Portu ne’e hetan lansamentu konstrusaun hosi Sua Eselénsia Primeiru-Ministru Taur Matan Ruak iha agostu tinan 2018, no tuir planu atu operasionaliza iha agostu tinan 2021, maibé tanba ho situasaun pandemia COVID-19, halo projetu ne’e tenke atrazu no tuir planu foin atu halo operasionalizasaun iha fulan Setembru-Outubru tinan ne’e.HOTU
#MediaGPM