Dili, loron 21 fulan-jullu tinan 2020: Sua Eselénsia Primeiru-Ministru Taur Matan Ruak orienta ona Ministru Finansas, Fernando Hanjam atu ko’a gastu deznesesáriu sira hodi evita gastu supérfluos iha Ministériu sira no Instituisaun Estadu nian, tanba Xefe Ezekutivu deskobre katak durante ne’e Ministériu no Institusaun sira halo serbisu dupla hodi  implika ba orsamentu.

“Ita boot sira haree, Ezemplu fatin istóriku, CHEGA mós halo, Muzeu Rezisténsia mós halo, Sekretáriu Estadu Arte Kultura mós halo, hotu-hotu halo buat ida de’it, depois duplika iha lojístika. Hanesan mós ba apoiu agrikultór sira, Ministériu Agrikultura mós apoiu, Sosiedade Sivíl mós apoiu, hosi Kooperativa mós apoiu.Tanba saida mak ita tenke duplika hanesan ne’e, entaun duplikasaun sira ne’e ita tenke ko’a, la iha nesesidade ko’a”, esplika Xefe Ezekutivu, foin lalais ne’e.

Orientasaun seluk ne’ebé Xefe Governu fó ba Ministru Finansas mak hanesan, tenke esforsu iha rekolla taxa sira ho forma agresivu atu bele aumenta reseita Estadu, aumenta montante impréstimu no reduz iha levantamentu Fundu Petrolíferu.

Xefe Governu esplika, razaun hamenus levantamentu ba Fundu Petróleu, tanba daudaun ne’e Fundu Petróleu tun maka’as impaktu hosi folin monu iha merkadu mundial monu tanba kauza mós hosi pandemia. Xefe Governu hein katak ho hamenus levantamentu Fundu Petróleu nian bele trava Fundu ba tempu naruk uitoan.

“Ne’e hanesan ezersísiu ida hodi bele dada fundu petróleu ba tinan barak uitoan, pelumenus previzaun ba 38 anos hotu ona karik, bele ba to’o netik 40 anos”, tenik nia.

Hanesan Xefe Governu, Primeiru-Ministru hateten sei halo esforsu másimu durante governasaun hodi halo poupansa ba gastu deznesesáriu sira, no foka ba programa prioridade sira ne’ebé liga direta ba povu nia moris, hanesan bee moos, estrada, eletrisidade no uma ba kbiit la’ek no ect.  HOTU/GPM