Primeiru-Ministru Taur Matan Ruak partisipa iha serimónia handover vasina AstraZeneca husi Governu Japaun

Dili, loron 16 fulan-agostu tinan 2021 – Sua Eselénsia Primeiru-Ministru Taur Matan Ruak, partisipa iha serimónia handover (entrega) vasina AstraZeneca  doze rihun 168, ne’ebé  mak oferese husi Governu Japaun mai Governu Timor-Leste liuhosi  mekanizmu sistema COVAX-ONU nian, segunda ne’e iha Ministériu Negósiu Estranjeiru no Kooperasaun, iha Praia dos Coqueiros, Dili.

Iha intervensaun ne’e, Xefe Governu agradese tebes ba esforsu Embaixadór Japaun nian iha Dili ba apoiu refere, nune’e através Embaixadór, Xefe Ezekutivu hodi povu timoroan sira-nia naran, agradese espesiál ba Governu no povu Japaun no ba Primeiru-Ministru ba jenerosidade iha tulun povu Timor-Leste hosi pandemia COVID-19, liuhosi doasaun vasina.

“Sr. Embaixadór, ha’u hakarak lori ha’u nia naran rasik, lori povu Timor nia naran, agradese ita-boot nia esforsu tomak no liuhusi ita-boot agradese ba Sr. Primeiru-Ministru Japaun no povu Japaun ba jenerosidade ne’ebé fó kontribuisaun vasina para salva vida iha ami nia rain” agradese Xefe Governu.

Xefe Governu mós la haluha agradese espesiál mós ba Organizasaun Mundial Saude (OMS), UNICEF ba esforsu fasilita transportasaun vasina sira ne’e mai Timor-Leste.

Ha’u-nia agradese espesiál ba organizasaun Mundial Saúde no Unicef ne’ebé halo esforsu ho difikuldade boot mós lori vasina ne’e to’o iha Timor, ho apoiu sira ne’e ha’u iha serteza katak a fim do ano se la’ós 100 % vasinasaun mak ami atinje, pelumenus 80% populasaun hetan vasinasaun para bele Timor fila-fali ba normalidade”, tenik.

Ho vasina apoiu hosi Japaun nian, Governu Timor-Leste simu ona vasina kumulativu hamutuk rihun 982,380, hosi sistema COVAX, rihun 100, 800, Nova Zelándia rihun 24, Xina rihun 100 [Sinovax], Austrália rihun 577, 580, Portugal rihun 12, no Japaun rihun 168, no husi númeru ida ne’e Timor konsege halo vasinasaun ba sidadaun iha Timor laran tomak ne’ebé elegível hosi tinan 18 ba leten, ho doze dahuluk atinje rihun 340,985 ka koresponde ba 45, 2 % (16 agostu) no doze daruak 127,769 ka koresponde ba 16, 9%, enkuantu ba Dili rasik

Governu mós agradese tebes ba profisionais Saúde iha Munisípiu Dili ne’ebé halo esforsu másimu hodi konsege vasina populasaun Dili 70% iha doze dahuluk no 49,1% iha doze daruak, númeru ne’e signifikante tebes, tanba Dili hanesan sidade kapitál ho númeru populasaun as liu ne’ebé ho komplesidade oioin, hodi hatutan ne’e nu’udar ezemplu ba Munisípiu seluk.

Ikus liu Xefe Governu prevé katak, to’o tinan ne’e nia rohan, pelumenus populasaun Timor-Leste 80% vasinadu hotu ona, nu’udar rekizitu ida hodi bele fó dalan ba Governu deside filafali ba normalidade foun.

Hola parte iha serimónia ne’e mak hanesan; Vise Primeira Ministra no Ministra Solidariedade Armanda Berta dos Santos,  Ministra Saúde, dra. Odete Freitas Belo,  Ministra Negósiu Estranjeiru  no Kooperasaun, Adaljiza Magno ho nia Vise, Julião da Silva, reprezentante UNICEF, Reprezentante OMS, Embaixadór Japaun iha Timor-Leste, Masami Kinefuchi  no entidade sira seluk. HOTU

#MediaGPM