Dili, loron 23 fulan-novembru tinan 2021 – Sua Eselénsia Primeiru-Ministru Taur Matan Ruak, tersa dadeer ne’e iha Palasiu Governu- Dili, hala’o reuniaun virtual ho Banku Mundial (BM) nia Vise Prezidente foun ba Leste Aziátiku no Pasífiku, Manuela V. Ferro, hodi ko’alia kona-ba komitmentu entre Timor-Leste no Banku Mundial nian ba prosesu dezenvolvimentu nasionál.

Iha reuniaun virtual ne’e, xefe Governu aproveita fó parabéns ba Vise Prezidente BM ba nia kargu foun refere, no revela polítika dezenvolvimentu nasionál nian, ko’alia mós kona-ba inseguransa ai-han no nutrisaun nian no planu rekuperasaun ekonómika pós COVID-19, inklui hanoin balun oinsá atu hamenus levantamentu ba Fundu Petróleu ne’ebé daudaun ne’e hanesan únika fonte ba Estadu Timor-Leste ho subtitui  polítika hasa’e impréstimu nian atu nune’e bele garante sustentabilidade Fundu Petrolífera nian ba tinan  naruk.

Aleinde ne’e Xefe Governu mós aproveita agradese ba apoiu Banku Mundial nian durante ne’e no konvida Vise Prezidente BM atu vizita Timor-Leste iha janeiru tinan oin, tanba Timor-Leste iha planu sei organiza semináriu alto nivel ida kona-ba malnutrisaun iha Dili, ne’ebé presija hetan apoiu hosi parseiru internasionál sira.

Entretantu Vise Prezidente BM ba Leste Aziátiku no Pasífiku, introduz nia an ba Xefe Governu no introduz mós nia ekipa iha Jakarta no Dili, no kontinua diskusaun ho Xefe Governu kona-ba komitmentu entre Timor-Leste no Banku Mundial nian ba prosesu dezenvolvimentu nasionál.

Enkuantu Kona-ba polítika rekuperasaun ekonómika nian, Vise Prezidente BM ne’e apresia tebes ho polítika refere no hateten Banku Mundial apoiu tebes inisiativa refere, no inisiativa seluk kona-ba hamenus levantamentu ba Fundu Petrolífera ho hasa’e fundu impréstimu.

Portugeza ne’e realsa, Banku Mundial sei kontinua disponivel atu apoiu Timor-Leste iha área hotu-hotu liuliu iha inseguransa ai-han no nutrisaun nian, no hein katak Timor-Leste bele aproveita di’ak apoiu refere ba benefísiu povu Timor-Leste. HOTU

#MediaGPM