Dili, loron 9 fulan novembru-tinan 2020 – Sua Exelénsia Primeiru-Ministru Taur Matan Ruak, segunda ne’e iha Palasiu Governu-Dili, simu iha audiénsia despedida ho Reprezentante UNICEF iha Timor-Leste, Valeire Taton.

Iha audiénsia despedida ne’e, Reprezentante UNICEF Valerie Taton, aproveita atu agradese ba Xefe Governu ba kooperasaun di’ak entre Governu no UNICEF durante ne’e, no aproveita  husu adeus tanba misaun termina ona no atu husik Timor Leste ba fali misaun foun iha  País Afrikanu, Senegal.

Xefe Ezekutivu agradese barak lideransa Señora Valerie Taton nian hanesan reprezentante UNICEF durante tinan tolu iha Timor-Leste ne’ebé apoiu tebes Governu iha área edukasaun nian. Xefe Governu rekoñese katak Governu iha dezafiu barak, maibé sei esforsu liuliu oinsá tau nafatin importánsia ba área edukasaun hodi hasa’e kualidade edukasaun, no prontu serbisu ho lideransa UNICEF foun tuir mai.

Enkuantu Reprezentante UNICEF, sente kontente tanba bele hetan oportunidade hanesan reprezentante UNICEF iha Timor-Leste durante tinan tolu, fulan tolu, hodi bele koñese besik liután timoroan sira nu’udar povu ida ne’ebé ho karater amigável. Nia mós apresia ho inisiativa Primeiru-Ministru nian hodi adere ba Movimentu Hadi’ak Nutrisaun (Scaling up Nutrition) hodi tau prioridade ba problema mal nutrisaun iha rai-laran, aleinde ne’e apresia mós kona-ba polítika Governu nian ba planu ligasaun internet fibra ótika hosi Austrália no sistema ID úniku, aleinde kongratula mós Governu ba susesu prevensaun KOVID-19 hodi ohin Timor-Leste la iha kazu ne’ebé grave no óbitu.

Aproveita despedida ne’e, Xefe Governu fó lembransa kaebauk timor nian, nu’udar jestu agradesimentu. HOTU/M-GPM