Dili, 30 Outubru 2019:  S.Exa. Primeiru-Ministru Taur Matan Ruak, kuarta-feira ne’e iha Palasiu Governu-Dili, simu iha audiénsia Prezidente ConocoPhillips Austrália Osidental, Chris Wilson ho nia reprezentante iha Dili, José Lobato, akompañadu hosi reprezentante kompañia Petrolífera Santos Limited.

Iha audiénsia ne’e, Prezidente ConocoPhillips introduz ba Xefe Governu kompañia Santos Limited ne’ebé sei troka ConocoPhillips nia atividade Petrolífera iha kampu Bayu-Undan, tanba kompañia ne’e sosa tiha ona intrese ConocoPhillips nian.

Primeiru-Ministru simu pozitivu mudansa ne’e hodi fó bem-vindu ba kompañia Santos no aproveita agradese ConocoPhillips nia serbisu durante ne’e ho Timor-Leste iha atividade esplorasaun,   Xefe Governu mós respeita no konsidera desizaun ConocoPhillips nian  ne’ebé fa’an nia asaun partisipasaun ba Santos Limited.

Entretantu Reprezentante Kompañia Santos Limited  ne’ebé foin dahuluk vizita Timor-Leste ne’e, fó garantia ba Xefe Governu katak, sira sei kontinua atividade esplorasaun  iha Bayu-Undan tuir kontratu ne’ebé iha atu fó benefísiu ba Timor-Leste no kompañia exploradora ne’e rasik.

Reprezentante ne’e mós konvida Xefe Governu nia posibilidade atu bele ba vizita sira-nia baze iha Queensland hodi bele haree besik kompañia ne’e nia serbisu.

Iha loron 13 fulan Outubru liu ba, ConocoPhillips fa’an ona nia negósiu Norte Austrália nian ba Santos Limited. Negósiu sira ne’e inklui mós Bayu-Undan, eskritóriu ida iha Perth, Darwin no Dili. Wainhira prosesu tranzasaun ne’e remata iha trimestral tinan 2020, ConocoPhillips sei husik Timor-Leste no sei troka hosi kompañia Santos.

Aleinde hasoru Xefe Governu, kompañia ne’e mós hasoru malu ona ho Ministru Estadu ba Prezidénsia Konsellu Ministru no Ministru Petróleu no Mineral Interinu, Hermenegildo “Agio” Pereira hodi hato’o asuntu ne’ebé hanesan. HOTU